Бізнес-навіны

Каранкевіч: другі энергаблок БелАЭС увядуць у прамысловую эксплуатацыю ў кастрычніку 2023 года

Фота з архiва

6 сакавіка, Мінск /Кар. БЕЛТА/. Другі энергаблок Беларускай атамнай электрастанцыі ўвядуць у прамысловую эксплуатацыю ў кастрычніку 2023 года. Аб гэтым паведаміў міністр энергетыкі Віктар Каранкевіч на нарадзе ў кіраўніка дзяржавы па пытаннях Беларускай АЭС, перадае карэспандэнт БЕЛТА.

У красавіку запланавана першае пробнае ўключэнне ў сетку другога энергаблока. Пры гэтым магутнасць рэактарнай устаноўкі будзе паднята да 40 працэнтаў. "У красавіку-верасні будуць паслядоўна ажыццяўляцца работы па асваенні магутнасці рэактарнай устаноўкі да намінальнай з правядзеннем выпрабаванняў у рамках доследна-прамысловай эксплуатацыі. Гатоўнасць да здачы АЭС у цэлым у адпаведнасці з праграмамі ўводу ў эксплуатацыю прагназуецца ў кастрычніку 2023 года", - расказаў Віктар Каранкевіч.

Міністр нагадаў, што першы энергаблок быў уведзены ў эксплуатацыю ў чэрвені 2021 года. У 2022 годзе ён прайшоў першы планава-папераджальны рамонт і цяпер працуе на намінальнай магутнасці.

"Агульная будаўнічая і тэхналагічная гатоўнасць другога энергаблока складае каля 98 працэнтаў. Вядуцца падрыхтоўчыя работы на завяршальнай стадыі для запуску ланцуговай рэакцыі і вываду рэактарнай устаноўкі на мінімальна кантралюемы ўзровень - гэта 1 працэнт магутнасці рэактара", - адзначыў кіраўнік Мінэнерга.

Як падкрэсліў у час нарады Прэзідэнт, радыяцыйная бяспека і надзейнасць эксплуатацыі атамнай станцыі - прыярытэт з прыярытэтаў. "Мы доўга абмяркоўвалі гэтыя пытанні на этапе прыняцця вельмі сур'ёзнага рашэння аб будаўніцтве станцыі, улічылі ўвесь сусветны вопыт. Тут выкарыстоўваюцца найвышэйшыя тэхналогіі. Гэта здабытак нашага народа. Таму ўсе пытанні будаўніцтва і работы атамнай станцыі патрабуюць асаблівай увагі і ўзважанага падыходу", - заявіў Аляксандр Лукашэнка.

З моманту ўключэння першы энергаблок выпрацаваў ужо больш за 12,5 млрд кВт⋅гадз, што дало магчымасць замясціць звыш 3 млрд кубаметраў газу і сэканоміць для краіны больш за $400 млн.

Беларуская АЭС з двума рэактарамі ВВЭР-1200 сумарнай магутнасцю 2400 МВт будуецца па расійскім праекце "АЭС-2006", які адносіцца да эвалюцыйных праектаў АЭС з вода-вадзянымі рэактарамі (ВВЭР) трэцяга пакалення павышанай бяспекі. Яны маюць палепшаныя тэхніка-эканамічныя паказчыкі. Галоўная іх асаблівасць - унікальнае спалучэнне актыўных і пасіўных сістэм бяспекі. Будынак рэактара ўкрыты двайной ахоўнай абалонкай. Рэактар не пацерпіць у выпадку землетрасення, урагану, паводкі.

Тэхналогія ВВЭР на сённяшні дзень з'яўляецца самай запатрабаванай і апрабаванай у свеце. З яе выкарыстаннем на працягу апошняга дзесяцігоддзя ўведзены ў эксплуатацыю АЭС у КНР і Індыі, а таксама плануюцца да ўводу АЭС у Егіпце, Турцыі, Венгрыі, Бангладэш, Узбекістане.

версія для друку

зрабіць стартавай

дабавіць у выбранае