Бізнес-навіны

Кампанія з Малдовы ўпершыню заключыла здзелку на пляцоўцы прамысловых і спажывецкіх тавараў БУТБ

Фота з архiва

21 ліпеня, Мінск /Кар. БЕЛТА/. Першая здзелка паміж суб'ектамі гаспадарання Беларусі і Малдовы зарэгістравана на пляцоўцы прамысловых і спажывецкіх тавараў Беларускай універсальнай таварнай біржы, у рамках якой дзейнічае сэрвіс імпартазамяшчэння, паведамілі БЕЛТА ў прэс-службе БУТБ.

Прадметам закупкі, ажыццёўленай адным з айчынных прадпрыемстваў тэкстыльнай прамысловасці, стала мембрана для ламінацыі тканіны коштам Br845 тыс. Такім чынам, пашырылася кола краін, рэзідэнты якіх выкарыстоўваюць біржавую B2B-платформу для рэалізацыі тавараў на беларускім рынку.

"Цяпер на нашай пляцоўцы размешчаны каля 149 тыс. актыўных заявак на продаж па 48 таварных катэгорыях - ад аўтатранспарту, бытавой тэхнікі і прадуктаў харчавання да будматэрыялаў, лабараторнага абсталявання і нафтахіміі. Пераважна гэта прапановы ад беларускіх прадпрыемстваў, аднак пул замежных пастаўшчыкоў таксама пастаянна расце. Так, калі ў пачатку года на пляцоўцы працавалі толькі расійскія кампаніі, то цяпер свае аферты рэгулярна размяшчаюць вытворцы з Кітая, Кыргызстана, Малдовы, Славакіі, Таджыкістана і Узбекістана. Зразумела, гэта забяспечвае дадатковыя магчымасці для беларускіх удзельнікаў таргоў, якія выкарыстоўваюць біржу як інструмент закупак", - расказалі ў прэс-службе.

ААТ "Беларуская ўніверсальная таварная біржа" створана ў 2004 годзе. Першыя таргі прайшлі ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

Паводле даных БУТБ, за першае паўгоддзе айчынныя прадпрыемствы і арганізацыі набылі на біржавой пляцоўцы прамысловыя і спажывецкія тавары на агульную суму Br328,5 млн. У структуры здзелак пераважала прадукцыя, вырабленая ў Беларусі, Расіі і Кітаі.

версія для друку

зрабіць стартавай

дабавіць у выбранае