Бізнес-навіны

Каля 30 беларускіх кандытарскіх вырабаў прадставяць на дэгустацыйным конкурсе на палях "Прадэкспа"

Фота з архiва

9 кастрычніка, Мінск /Кар. БЕЛТА/. У Навукова-практычным цэнтры Нацыянальнай акадэміі навук Беларусі па харчаванні прайшло пасяджэнне экспертнай камісіі, на якім ацэньвалася якасць кандытарскіх вырабаў, што прэтэндуюць на ўзнагароды міжнароднага дэгустацыйнага конкурсу якасці харчовай прадукцыі "ПРАДЭКСПА: Традыцыі. Якасць. Інавацыі", паведамілі БЕЛТА ў канцэрне "Белдзяржхарчпрам".

Усяго было прадстаўлена 28 узораў кандытарскіх вырабаў (шакалад, цукеркі, пасціла, зефір, пячэнне, вафлі) ад шасці айчынных вытворцаў. Ацэнку ласункаў праводзілі эксперты з ліку прадстаўнікоў канцэрна "Белдзяржхарчпрам", Дзяржстандарту, Міністэрства аховы здароўя, Нацыянальнай акадэміі навук і Міністэрства адукацыі.

Як удакладнілі ў канцэрне, арганалептычная ацэнка прадукцыі праводзіцца шляхам закрытай дэгустацыі членамі экспертнай камісіі. Узоры прадукцыі прадстаўляюцца дэгустатарам у закадзіраваным выглядзе без паведамлення наймення прадпрыемства-вытворцы з пазначэннем групы прадукцыі і асноўных патрабаванняў да прадукцыі гэтага віду. Падача вырабаў вядзецца спосабам, які не дае магчымасці ідэнтыфікаваць узор. Ананімнасць узораў раскрываецца толькі пасля заканчэння дэгустацыі і размеркавання ўзнагарод.

З улікам атрыманай бальнай ацэнкі вытворцы харчовай прадукцыі ўдастойваюцца Гран-пры, залатога або сярэбранага медаля, якія прысвойваюцца ўзорам, што атрымалі найбольшую колькасць балаў у рамках сваёй намінацыі. Акрамя асноўных узнагарод, узоры харчовай прадукцыі могуць быць адзначаны дыпломамі якасці: "Вернасць традыцыям", "Гордасць маркі", "Адкрыццё года", "Лепшы інавацыйны прадукт", "Лепшая ўпакоўка".

Да ўдзелу ў конкурсе дапускаюцца прадпрыемствы харчовай і перапрацоўчай прамысловасці любых форм уласнасці, сельскагаспадарчыя арганізацыі, сялянскія (фермерскія) гаспадаркі, прадпрыемствы малога бізнесу, індывідуальныя прадпрымальнікі, якія займаюцца вытворчасцю харчовай прадукцыі, прадпрыемствы гандлю, па заказе якіх вырабляюцца тавары пад уласнай гандлёвай маркай, гэта значыць тавары з нанесеным таварным знакам, і прадпрыемствы гандлю, якія з'яўляюцца вытворцамі або ўпакоўшчыкамі харчовай прадукцыі.

"Міжнародны дэгустацыйны конкурс "ПРАДЭКСПА: Традыцыі. Якасць. Інавацыі" стаў знакавай падзеяй у свеце смачных адкрыццяў. Ён праводзіцца пяты раз. На гэты раз на суд дэгустатараў была прадстаўлена лепшая кандытарская прадукцыя рэспублікі", - дадала намеснік начальніка ўпраўлення па вытворчасці прадуктаў харчавання канцэрна "Белдзяржхарчпрам" Аксана Блізнюк.

У лістападзе на палях ХХХ Міжнароднай спецыялізаванай аптовай выстаўкі-кірмашу "Прадэкспа" пройдзе абвяшчэнне пераможцаў дэгустацыйнага конкурсу і іх узнагароджанне.

Міжнародны дэгустацыйны конкурс якасці харчовай прадукцыі праводзіцца з мэтай паказу шырокай грамадскасці дасягненняў у галіне вытворчасці харчовых прадуктаў, выяўлення лепшых узораў харчовай прадукцыі і іх вытворцаў, папулярызацыі харчовых прадуктаў для розных груп насельніцтва, у тым ліку прадукцыі для дзіцячага харчавання, спецыялізаванай харчовай прадукцыі, вызначэння найноўшых тэндэнцый у развіцці айчыннага рынку харчовай прадукцыі, садзейнічання паляпшэнню якасці харчовых прадуктаў і павышэнню культуры спажывання, пашырэння сувязей і абмену інфармацыяй вытворцаў гэтай прадукцыі, умацавання экспартнага патэнцыялу Беларусі і павелічэння колькасці прадукцыі ўдзельнікаў конкурсу на ўнутраным і знешнім рынках.

версія для друку

зрабіць стартавай

дабавіць у выбранае