Бізнес-навіны

Генконсул у Гуанчжоу: Беларусь як інвестпляцоўка валодае асаблівымі перавагамі

Фота з архiва

10 сакавіка, Мінск /Кар. БЕЛТА/. Беларусь як інвестыцыйная пляцоўка валодае асаблівымі перавагамі. Такое меркаванне выказаў генеральны консул Беларусі ў Гуанчжоу Андрэй Папоў у час 8-й Кітайскай (Гуанчжоу) міжнароднай інвестыцыйнай канферэнцыі ў Мінску, перадае карэспандэнт БЕЛТА.

"Пазіцыянаванне Беларусі ў якасці перспектыўнай інвестыцыйнай пляцоўкі поўнасцю абгрунтавана і апраўдана, паколькі наша дзяржава валодае для гэтага шэрагам пераваг. Па-першае, адкрытасць эканомікі Беларусі і яе шырокая дыверсіфікацыя. Сярод нашых гандлёвых партнёраў больш за 180 дзяржаў свету. Па-другое, высокакваліфікаваныя спецыялісты. Згодна з данымі ПРААН, Беларусь уваходзіць у групу краін з высокім чалавечым патэнцыялам", - сказаў Андрэй Папоў.

Па-трэцяе, выгаднае геаграфічнае становішча. "Беларусь знаходзіцца на стыку двух вялікіх эканамічных саюзаў - Еўрасаюза і ЕАЭС. Прычым з'яўляецца часткай апошняга, куды таксама ўваходзяць Расія, Арменія, Казахстан і Кыргызстан. Гэта значыць, што бізнес, размешчаны ў нашай рэспубліцы, таксама атрымлівае доступ да рынку Еўразійскага эканамічнага саюза, які складае больш за 180 млн спажыўцоў. Тавары, вырабленыя ў Беларусі, могуць свабодна перамяшчацца па тэрыторыі ЕАЭС без выплаты мытных збораў і пошлін", - растлумачыў ён.

Па-чацвёртае, развітое інвестыцыйнае заканадаўства. "З 2013 года ў краіне дзейнічае закон аб інвестыцыях, які поўнасцю адпавядае міжнародным стандартам. У адпаведнасці з ім правы замежных і беларускіх інвестараў поўнасцю ўраўноўваюцца. Беларусь падпісала 66 пагадненняў аб заахвочванні і ўзаемнай абароне інвестыцый, а таксама 70 пагадненняў аб прадухіленні двайнога падаткаабкладання. З 2012 года рэспубліка - паўнацэнны ўдзельнік шматбаковага агенцтва па інвестыцыйных гарантыях. Цяпер вядзецца падрыхтоўка пагаднення аб гандлі паслугамі і ажыццяўленні інвестыцый паміж Беларуссю і Кітаем", - расказаў генконсул.

У Беларусі ёсць цэлая сістэма прэферэнцыйных рэжымаў для вядзення бізнесу. "У рамках гэтых рэжымаў інвестары могуць выкарыстоўваць падатковыя, мытныя льготы і іншыя перавагі. У прыватнасці, у Беларусі паспяхова прымяняецца сусветная практыка дзеяння рэжымаў свабодных эканамічных зон. Цяпер створана шэсць такіх СЭЗ, па адной у кожным рэгіёне. Яны сканцэнтраваны на пэўнай тэрыторыі, з неабходнай інфраструктурай і арганізацыяй экспартна-арыентаванай вытворчасці. Сёння стаць рэзідэнтам СЭЗ можна, калі інвесціраваць не менш за 500 тыс. еўра на працягу трох гадоў з моманту рэгістрацыі", - адзначыў ён.

Таксама, паводле слоў консула, выгадным рэжымам для вядзення бізнесу ў Беларусі з'яўляецца індустрыяльны парк "Вялікі камень".

Яшчэ адзін ільготны рэжым прадстаўлены Паркам высокіх тэхналогій. "Рэзідэнты парка вызвалены ад усіх карпаратыўных падаткаў, уключаючы ПДВ, падаходны падатак, мытныя пошліны. Пры гэтым рэзідэнтам ПВТ можна стаць, зарэгістраваўшы кампанію ў любым пункце Беларусі, - паведаміў Андрэй Папоў. - У 2020 годзе было ўведзена новае заканадаўства ў сферы рэгулявання лічбавай эканомікі, што фактычна робіць Беларусь адной з самых IT-дружалюбных краін свету. Пералік мерапрыемстваў для рэзідэнтаў ПВТ значна пашырыўся, ён уключае ў сябе ўвядзенне інстытутаў англійскага права, устараненне абмежаванняў на занятасць замежнай рабочай сілы, а таксама беспрэцэдэнтныя ўмовы па рэгуляванні лічбавых валют і токенаў".

Асобны рэжым створаны для малога бізнесу, які вядзе эканамічную дзейнасць у малых гарадах з насельніцтвам меншым за 60 тыс. чалавек і ў сельскай мясцовасці. "Тут інвестар вызвалены ад падатку на прыбытак, нерухомую маёмасць, ад выплаты ўвазных пошлін і ПДВ", - дадаў ён.

У мінулым годзе ў Беларусі з'явіліся два новыя рэжымы ў Аршанскім раёне, размешчаным паблізу з граніцай Расійскай Федэрацыі. "Асаблівасць раёна ў тым, што гэта вялікі транспартны вузел, дзе сыходзяцца аўтамабільныя і чыгуначныя магістралі з Еўропы ў Расію, з Украіны да Балтыйскага мора. Ён знаходзіцца на асаблівым кантролі. Бізнес тут надзелены дадатковымі падатковымі льготамі", - сказаў Андрэй Папоў.

Таксама ў гэтым рэгіёне ёсць асаблівая эканамічная зона "Брэміна-Орша". "Яна ўяўляе сабой мультымадальны прамыслова-лагістычны комплекс, будаўніцтва якога цяпер ідзе паскоранымі тэмпамі. Акрамя існуючых тут магістралей, чыгуначных вузлоў недалёка ад СЭЗ ёсць аэрапорт", - адзначыў генконсул.

Акрамя згаданых прэферэнцыйных рэжымаў, замежны інвестар можа заключыць інвестыцыйны дагавор з Рэспублікай Беларусь аб рэалізацыі інвестпраекта. "Такі дагавор дае магчымасць атрымаць асаблівыя прэферэнцыі з боку дзяржавы, а таксама дадаткова замацоўвае ўжо ўстаноўленыя правы і гарантыі замежнай кампаніі. Пры гэтым размяшчэнне вытворчасці не прывязана да нейкай тэрыторыі", - рэзюмаваў Андрэй Папоў.

версія для друку

зрабіць стартавай

дабавіць у выбранае