Бізнес-навіны

Галоўчанка: трэба павялічваць эфект ад укладзеных у навуковыя распрацоўкі сродкаў

11 лістапада, Мінск /Кар. БЕЛТА/. У Беларусі трэба павялічваць эфект ад укладзеных у навуковыя распрацоўкі сродкаў. Аб гэтым заявіў журналістам прэм'ер-міністр Раман Галоўчанка па выніках наведвання Мінскага гарадскога тэхнапарка, перадае карэспандэнт БЕЛТА.

"Навукова-тэхнічная палітыка дзяржавы грунтуецца выключна на прынцыпах запатрабаванасці прагназуемых вынікаў. У тым ліку і па маім патрабаванні мы некалькі гадоў ужо выкарыстоўваем падыход, у адпаведнасці з якім любая распрацоўка, асабліва якая фінансуецца за кошт бюджэтных сродкаў, павінна мець заказчыка. Каб мы потым не траплялі ў сітуацыю, калі распрацоўка створана, а яе ніхто не хоча ўкараняць, або яна атрымалася занадта дарагой і заказчыка пад яе няма. Распрацоўшчыкі грошы атрымалі, а ўкаранення няма - такога быць не павінна. Не скажу, што гэта сістэма працуе на 100 працэнтаў ідэальна, але прагрэс відавочны. Цяпер ідзе канчатковы паварот да поўнай змычкі навукі з вытворчасцю", - канстатаваў Раман Галоўчанка.

Ён адзначыў, што грошы, якія ўкладваюцца ў навукова-тэхнічную дзейнасць, даюць свой эфект. "На адзін рубель укладзеных сродкаў будзе каля 15 рублёў выпуску інавацыйнай прадукцыі. Аддача вельмі сур'ёзная. Акрамя таго, амаль пятая частка ад кошту рэалізаванай прадукцыі вяртаецца непасрэдна ў бюджэт у выглядзе ПДВ. І, вядома, маюць значэнне агульныя паказчыкі экспарту. Таму прамыя бюджэтныя інвестыцыі ў распрацоўкі вяртаюцца кумулятыўным спосабам. Галоўная задача - яшчэ больш павялічыць эфектыўнасць аддачы ад укладзеных сродкаў", - падкрэсліў прэм'ер-міністр.

Паводле яго слоў, неабходна, каб уся навука працавала выключна на канкрэтныя задачы і патрэбнасці айчыннай эканомікі. "І нават калі распрацоўка па нейкай прычыне не запатрабавана цалкам у айчынным рэальным сектары, яна павінна быць упакавана ў прадаваемую абалонку. Гэта значыць мы павінны прадаваць тэхналогіі, усё роўна, на ўнутраным або знешнім рынку. Таму яшчэ ёсць над чым працаваць. Трэба павышаць эфектыўнасць навукова-тэхнічнай дзейнасці. Цяпер мы ацэньваем яе як здавальняючую", - звярнуў увагу кіраўнік беларускага ўрада.

Таксама ён закрануў тэму абсталявання тэхнапаркаў. "Ёсць цэнтры калектыўнага карыстання, дзе размяшчаецца дарагое абсталяванне, якое не можа дазволіць сабе невялікая кампанія. Гэта складаныя станкі, вымяральнае абсталяванне. Напрыклад, такі цэнтр ёсць у Мінскім гарадскім тэхнапарку", - адзначыў Раман Галоўчанка. Акрамя таго, у рамках дзяржпраграмы інавацыйнага развіцця сродкі выдзяляюцца на закупку абсталявання, неабходнага рэзідэнтам тэхнапаркаў для арганізацыі інавацыйных вытворчасцей. На гэтыя мэты прадугледжана Br167,8 млн бюджэтных сродкаў.

Усяго ў Мінскім гарадскім тэхнапарку 54 прадпрыемствы-рэзідэнты, якія размяшчаюцца на трох пляцоўках. Найбольшая колькасць - 43 - размешчаны на вул.Солтыса. Яшчэ 10 рэзідэнтаў размяшчаюцца на Партызанскім праспекце. На пляцоўцы на вул.Цэнтральнай - адзін рэзідэнт. Раман Галоўчанка сёння наведвае пляцоўку на вул.Солтыса, дзе і зараджаўся тэхнапарк.

У прыватнасці, яму паказалі эксклюзіўныя распрацоўкі рэзідэнта тэхнапарка ТАА "Медбіятэх". Прадпрыемства распрацоўвае і выпускае вырабы медыцынскага прызначэння (імпланты і інструментарый), якія выкарыстоўваюцца ў траўматалогіі і артапедыі, спінальнай і нейрахірургіі.

Таксама прэм'ер-міністр азнаёміўся з дзейнасцю іншых рэзідэнтаў, якія адносяцца да самых розных галін. Стварэнне кампанентаў для аэракасмічных сістэм, электратранспарту і транспартных сродкаў з электрапрыводам, вытворчасць праграмна-апаратных сродкаў і комплексаў для кіравання электроннай чаргой, кармавых дабавак, вырабаў медыцынскага прызначэння для афтальмалогіі, отарыналарынгалогіі, экзапратэзавання, гандлёвага і складскога абсталявання - прадпрыемствы працуюць па гэтых і многіх іншых напрамках.

У планах тэхнапарка - далейшае пашырэнне і развіццё, павелічэнне колькасці рэзідэнтаў.

версія для друку

зрабіць стартавай

дабавіць у выбранае