Бізнес-навіны

Галоўчанка: гандлёва-эканамічнае супрацоўніцтва Беларусі і Азербайджана развіваецца паспяхова

6 чэрвеня, Мінск /Кар. БЕЛТА/. Гандлёва-эканамічнае супрацоўніцтва Беларусі і Азербайджана развіваецца паспяхова. Аб гэтым заявіў прэм'ер-міністр Беларусі Раман Галоўчанка ў час сустрэчы з намеснікам прэм'ер-міністра Азербайджана Алі Ахмедавым, перадае карэспандэнт БЕЛТА.

"Беларусь і Азербайджан звязваюць самыя трывалыя, моцныя братэрскія адносіны. Наша дружба праверана гадамі, у самыя складаныя перыяды мы заўсёды былі побач, дапамагалі адзін аднаму, заўсёды знаходзілі рашэнні любых пытанняў. Паміж кіраўнікамі ўсіх узроўняў наладжаны канструктыўныя і цёплыя адносіны. Такія адносіны ўстаноўлены фактычна па ўсіх вектарах узаемадзеяння - ад сілавых структур да гуманітарных. Вельмі важна, што ўсе гэтыя гады Беларусь і Азербайджан ніколі не паддаваліся нейкай кан'юнктуры. Мы гэта вельмі цэнім у адносінах з азербайджанскімі партнёрамі", - сказаў Раман Галоўчанка.

Ён адзначыў, што парадак дня двухбаковага супрацоўніцтва вельмі насычаны і шматгранны. "Па выніках дзяржаўнага візіту Прэзідэнта Беларусі ў Азербайджан кіраўнікамі дзяржаў пастаўлены вельмі сур'ёзныя задачы перад урадамі. У нас ёсць рашучасць выканаць гэтыя даручэнні, але вельмі шмат будзе залежаць ад планавання гэтай работы, адказнасці і выверанасці дзеянняў выканаўцаў, якім даручана рэалізацыя мерапрыемстваў", - лічыць прэм'ер-міністр.

"З задавальненнем адзначаю, што нават без уліку гэтых даручэнняў гандлёва-эканамічнае супрацоўніцтва ў бягучым годзе развіваецца цалкам паспяхова. Аб гэтым сведчыць і статыстыка, і з'яўленне ў пераліку ўзаемных паставак новых таварных пазіцый. Бачым рэальную зацікаўленасць калег з Азербайджана рэалізоўваць сумесныя праекты", - падкрэсліў кіраўнік беларускага ўрада.

Ён таксама звярнуў увагу на тое, што вядзецца падрыхтоўка да візіту прэм'ер-міністра Азербайджана ў Беларусь, які намечаны на верасень гэтага года.

версія для друку

зрабіць стартавай

дабавіць у выбранае