Бізнес-навіны

ENSREG адобрыла справаздачу Нацыянальнага плана дзеянняў па выніках правядзення стрэс-тэстаў БелАЭС

25 лістапада, Мінск /Кар. БЕЛТА/. Адбылося пленарнае пасяджэнне Еўрапейскай групы рэгулюючых органаў ядзернай бяспекі (European Nuclear Safety Regulators Group, ENSREG), у якім Дзяржатамнагляд прыняў удзел па відэа-канферэнц-сувязі ў якасці наглядальніка. На мерапрыемстве абмеркаваны актуальныя пытанні рэгулявання ядзернай бяспекі, у тым ліку справаздача ENSREG аб партнёрскім аглядзе Нацыянальнага плана дзеянняў па выніках правядзення стрэс-тэстаў БелАЭС. У выніку абмеркавання справаздача была адобрана, паведамляе БЕЛТА са спасылкай на сайт Дзяржатамнагляду.

У справаздачы ENSREG адзначана, што ў Нацыянальным плане дзеянняў знайшлі адлюстраванне ўсе рэкамендацыі ENSREG 2018 года, якія былі сфармуляваны па выніках партнёрскай праверкі Нацыянальнага даклада аб стрэс-тэстах Беларускай АЭС. "Усе дзеянні, якія Дзяржатамнагляд і БелАЭС вырашылі правесці, адпавядаюць сутнасці рэкамендацый ENSREG 2018 года", - гаворыцца ў паведамленні.

З 22 рэкамендацый, выкладзеных у справаздачы ENSREG 2018 года, 17 былі рэалізаваны поўнасцю і могуць лічыцца выкананымі. Дзеянні, звязаныя з пяццю рэкамендацыямі, выконваюцца і адпавядаюць сутнасці рэкамендацый. Дзяржатамнагляд і БелАЭС паскорылі выкананне некалькіх дзеянняў у параўнанні з першапачатковым графікам.

Эксперты ENSREG лічаць, што ў выкананні Нацыянальнага плана дзеянняў дасягнуты сур'ёзны прагрэс. "Асобна адзначана адкрытасць і транспатэнтнасць беларускага боку, у тым ліку публікацыя Нацплана дзеянняў у адкрытым доступе на інтэрнэт-рэсурсе Дзяржатамнагляду, а таксама паслядоўнае асвятленне арганізацыяй розных этапаў партнёрскага агляду", - дадалі ў ведамстве.

Начальнік Дзяржатамнагляду Вольга Лугаўская падзякавала камандзе ENSREG на чале з яе кіраўніком Петэры Цііпана за канструктыўнае і плённае супрацоўніцтва і сумесную працу на ўсіх этапах партнёрскага агляду. Яна адзначыла, што ў Нацыянальны план дзеянняў у лістападзе бягучага года ўнесены дапаўненні, якія сфарміраваны з улікам вынікаў рэалізацыі яго мерапрыемстваў у 2019-2021 гадах, а таксама па выніках узаемадзеяння з экспертамі ENSREG у рамках партнёрскага агляду 2020-2021 гадоў. Начальнік Дзяржатамнагляду запэўніла, што ўсе мерапрыемствы Нацплана дзеянняў будуць выкананы ва ўстаноўленыя тэрміны і пад наглядам беларускага рэгулюючага органа.

ENSREG - незалежная экспертная кансультацыйная група, створаная ў 2007 годзе па рашэнні Еўрапейскай камісіі. У яе склад уваходзяць высокапастаўленыя службовыя асобы нацыянальных рэгулюючых органаў па ядзернай бяспецы, бяспецы радыеактыўных адходаў і па радыяцыйнай абароне, а таксама асобы з дзяржаў Еўрапейскага саюза, якія маюць кампетэнцыю ў гэтых галінах, і прадстаўнікі Еўрапейскай камісіі. Беларусь у асобе Дзяржатамнагляду запрошана ў ENSREG у якасці наглядальніка ў 2018 годзе.

Стрэс-тэсты Беларускай АЭС праведзены ў 2016-2018 гадах па працэдуры Еўрапейскага саюза і ўключалі тры этапы: самаацэнку БелАЭС, нацыянальную ацэнку і партнёрскую праверку Еўрапейскай групы рэгулюючых органаў ядзернай бяспекі ENSREG. У 2019 годзе Дзяржатамнагляд сумесна з зацікаўленымі сфарміраваў адпаведны Нацыянальны план дзеянняў.

версія для друку

зрабіць стартавай

дабавіць у выбранае