Бізнес-навіны

Энергаёмістасць ВУП Беларусі за 2022 год плануюць знізіць на 0,6 працэнта

Фота з архiва

22 лютага, Мінск /Кар. БЕЛТА/. Энергаёмістасць ВУП Беларусі за 2022 год плануюць знізіць на 0,6 працэнта. Аб гэтым сказаў сёння намеснік старшыні Дзяржстандарту - дырэктар Дэпартамента па энергаэфектыўнасці Віталь Крэцкі на падагульняючай калегіі ведамства, паведамляе карэспандэнт БЕЛТА.

Паводле слоў Віталя Крэцкага, у бягучым годзе зніжэнне энергаёмістасці ВУП запланавана на 0,6 працэнта да ўзроўню 2021 года пры тэмпах росту ВУП 102,9 працэнта.

"Эфектыўнасць работы ў рэспубліцы па зніжэнні энергаёмістасці айчыннага ВУП пацвярджаецца данымі Міжнароднага энергетычнага агенцтва, згодна з якім у 2019 годзе энергаёмістасць ВУП Беларусі знізілася ў 2,1 раза да ўзроўню 2000 года. Гэта намнога інтэнсіўней, чым зніжэнне энергаёмістасці такой эканамічна развітой краіны, як Швецыя, і ў 2 разы інтэнсіўней, чым у Канадзе - краіне з падобнымі кліматычнымі ўмовамі. Фактычны паказчык энергаёмістасці ВУП Беларусі склаў 0,146 т нафтавага эквіваленту на $1 тыс. ВУП па парытэце пакупной здольнасці ў цэнах 2015 года. У параўнанні з прамыслова развітымі краінамі - членамі ЕАЭС Беларусь займае лідзіруючае становішча", - расказаў ён.

Эканомія паліўна-энергетычных рэсурсаў (ПЭР) за 2021 год склала 685,8 тыс. т умоўнага паліва пры плане 550 тыс. т. Найбольшую эканомію ПЭР - 265,5 тыс. т умоўнага паліва - удалося забяспечыць дзякуючы ўкараненню ў вытворчасць сучасных энергаэфектыўных (і павышэнню энергаэфектыўнасці дзеючых) тэхналогій, працэсаў, абсталявання і матэрыялаў. У планах на бягучы год - забеспячэнне аб'ёму эканоміі ПЭР на менш за 0,6 млн т у.п.

"Павышэнне эфектыўнасці выкарыстання энергарэсурсаў на асобным прадпрыемстве выяўляецца перш за ўсё на зніжэнні энергаёмістасці выпускаемай прадукцыі і, як вынік, павышэнні яе канкурэнтаздольнасці як на ўнутраным, так і знешнім рынках", - падкрэсліў дырэктар Дэпартамента па энергаэфектыўнасці.

Як ён адзначыў, мэтавыя паказчыкі энергазберажэння на 2021 год, устаноўленыя дзяржпраграмай, выкананы большасцю органаў дзяржаўнага кіравання і рэгіёнаў.

"Важнейшым напрамкам зніжэння залежнасці Беларусі ад вуглевадародаў з'яўляецца павелічэнне выкарыстання мясцовых паліўна-энергетычных рэсурсаў, у тым ліку аднаўляльных крыніц энергіі (АКЭ). Доля мясцовых рэсурсаў у валавым спажыванні АКЭ ў мінулым годзе склала 16,1 працэнта. Доля АКЭ ў валавым спажыванні ПЭР - 7,4 працэнта", - паведаміў Віталь Крэцкі.

Што датычыцца фінансавання энергазберагальных мерапрыемстваў, па выніках года асвоена Br944 млн. Асноўнымі крыніцамі фінансавання былі ўласныя сродкі арганізацый і сродкі мясцовых бюджэтаў, доля якіх склала каля 80 працэнтаў у агульным аб'ёме інвестыцый.

Кіраўнік дэпартамента таксама расказаў аб планах на бягучы год. У прыватнасці, гэта кантроль за будаўніцтвам энергакрыніц на мясцовых ПЭР, рэалізацыя мерапрыемстваў па лічбавізацыі дзейнасці ў сферы энергазберажэння, працяг работы па ўдасканаленні нарматыўна-прававой базы ў сферы энергазберажэння, пашырэнне прафілактычна-папераджальнай і растлумачальнай работы пры правядзенні кантрольна-наглядных мерапрыемстваў і г.д.

Што датычыцца міжнароднага супрацоўніцтва, у 2022 годзе дэпартамент прадоўжыць падрыхтоўку і рэалізацыю сумесных з міжнароднымі арганізацыямі праектаў па павышэнні энергаэфектыўнасці і развіцці выкарыстання АКЭ.

У прыватнасці, у планах завяршыць інвестыцыйны праект "Выкарыстанне драўнянай біямасы для цэнтралізаванага цеплазабеспячэння". Ён прадугледжвае будаўніцтва і рэканструкцыю кацельняў жыллёва-камунальнай гаспадаркі з выкарыстаннем там драўнянага паліва. Таксама ведамства прадоўжыць работу па прыцягненні фінансавання для праекта па павышэнні энергаэфектыўнасці аб'ектаў сацыяльнай сферы.

версія для друку

зрабіць стартавай

дабавіць у выбранае