Бізнес-навіны

Экспарт рэзідэнтаў СЭЗ "Мінск" у 2019 годзе склаў $1 млрд 315 млн

Фота з архiва

21 лютага, Мінск /Кар. БЕЛТА/. У 2019 годзе аб'ём экспарту рэзідэнтаў СЭЗ "Мінск" склаў $1 млрд 315 млн з тэмпам росту 118 працэнтаў да ўзроўню 2018 года, паведамілі БЕЛТА ў адміністрацыі СЭЗ.

"Ужо трэці год экспарт рэзідэнтаў перавышае $1 млрд, што сведчыць аб дадатнай дынаміцы ў тэмпах росту экспарту нашых прадпрыемстваў. Прадукцыя пастаўляецца ў 80 краін свету", - расказалі ў СЭЗ "Мінск".

На новых вытворчасцях створана больш за 1,5 тыс. рабочых месцаў (132 працэнты да ўзроўню 2018 года), прыцягнута $92 млн інвестыцый, выплачана падаткаў, збораў і плацяжоў у бюджэт і пазабюджэтныя фонды на суму Br342 млн (121 працэнт да 2018 года).

У 2019 годзе адміністрацыя СЭЗ "Мінск" зарэгістравала 17 новых кампаній-рэзідэнтаў. Сярод іх, напрыклад, прадпрыемствы, якія спецыялізуюцца на вытворчасці стальных кантэйнераў для транспарціроўкі грузаў рознымі відамі транспарту ў Маладзечне, стварэнні антывандальных прыбораў уліку расходу вады ў Жодзіне, вырабе драўляных дзвярэй і вокнаў па скандынаўскай тэхналогіі ў Барысаве.

На 2020 год кіраўніцтва СЭЗ "Мінск" у прыярытэт паставіла задачу па асваенні тэрыторыі СЭЗ "Мінск" у раёне Фаніпаля. Тут у адпаведнасці з распрацаваным дэталёвым планам вызначаны больш за 50 інвестыцыйных участкаў (памерам ад 1,2 да 11,2 га) агульнай плошчай каля 190 га, якія прызначаны для рэалізацыі новых інвестыцыйных праектаў.

"Кропкай росту для развіцця гэтай тэрыторыі стане будаўніцтва электрычнай падстанцыі "Чаркасы" і газаправода высокага ціску, а таксама неабходных для іх функцыянавання аб'ектаў інжынернай і транспартнай інфраструктуры", - адзначылі ў адміністрацыі. Ужо цяпер ідзе паэтапнае асваенне перспектыўнай тэрыторыі. 12 рэзідэнтаў СЭЗ вядуць тут вытворчую дзейнасць, яшчэ 4 кампаніі знаходзяцца на стадыі ўзгаднення і атрымання зямельных участкаў.

версія для друку

зрабіць стартавай

дабавіць у выбранае