Бізнес-навіны

ЕБРР з-за каранавіруса акажа падтрымку кліентам у Беларусі

Фота з архiва

16 сакавіка, Мінск /Кар. БЕЛТА/. Еўрапейскі банк рэканструкцыі і развіцця з-за распаўсюджвання каранавіруса COVID-19 акажа падтрымку кліентам у краінах аперацый банка, у лік якіх уваходзіць і Беларусь, паведамілі карэспандэнту БЕЛТА ў прэс-службе ЕБРР.

У мінулую пятніцу савет дырэктараў ЕБРР адобрыў выдзяленне экстраннай дапамогі краінам, дзе працуе банк, у памеры 1 млрд еўра ў якасці першага кроку, за якім могуць адбыцца і іншыя, калі таго запатрабуе сітуацыя.

"Наш "Пакет салідарнай дапамогі" дэманструе гатоўнасць весці бізнес у ранейшым аб'ёме, а таксама аператыўна і рашуча рэагаваць на магчымыя змяненні бягучай сітуацыі. Для вырашэння гэтых задач банк будзе абапірацца на значны статутны капітал і паспяховыя вынікі аперацыйнай дзейнасці, дасягнутыя апошнім часам. У ЕБРР ёсць усе інструменты і рэсурсы для дапамогі кліентам і краінам аперацый", - адзначылі ў банку.

Рашэнне падтрымаць Беларусь было прынята ў пятніцу ўвечары, удакладнілі ў ЕБРР, таму рана гаварыць пра канкрэтныя праекты і лічбы. "Так, падтрымаем кліентаў у Беларусі. Менавіта кліентаў, паколькі сістэмная дапамога дзяржаве - прэрагатыва іншых арганізацый. Улічваючы аб'ём праектаў у дзяржсектары, разгледзім і прапановы, звязаныя з імі", - адзначылі ў банку.

Адказваючы на пытанне аб кароткатэрміновых і доўгатэрміновых прагнозах банка адносна наступстваў сітуацыі з каранавірусам для эканомікі, у ЕБРР адзначылі, што, зыходзячы з дынамікі падзей, пакуль вельмі складана зрабіць канчатковыя вывады. "Макраэканамічныя паказчыкі рэгіёнаў дзейнасці ЕБРР будуць перагледжаны, але, у адрозненне ад фінансавага крызісу 2008 года, аб магчымасці далейшага росту эканомік можна будзе гаварыць толькі пасля таго, як адступіць пагроза віруса", - лічаць у банку.

Еўрапейскі банк рэканструкцыі і развіцця - шматбаковы банк, які садзейнічае развіццю прыватнага сектара і прадпрымальніцкай ініцыятывы ў 38 эканоміках на трох кантынентах. Акцыянерамі банка з'яўляюцца 69 краін, а таксама ЕС і ЕІБ. З пачатку сваёй дзейнасці ў Беларусі ў 1992 годзе ЕБРР інвесціраваў амаль 2,9 млрд еўра ў 130 праектаў у розных сектарах эканомікі краіны.

версія для друку

зрабіць стартавай

дабавіць у выбранае