Бізнес-навіны

18 красавіка, Мінск /Кар. БЕЛТА/. У 2018 годзе 10 рэзідэнтаў Кітайска-беларускага індустрыяльнага парка "Вялікі камень" плануюць пабудаваць свае прадпрыемствы. Аб гэтым у праграме "Тыдзень" на тэлеканале СТБ заявіў намеснік кіраўніка Адміністрацыі Прэзідэнта Мікалай Снапкоў, паведамляе БЕЛТА.

"Паводле нашай інфармацыі, усе рэзідэнты парка збіраюцца будавацца. Думаю, ужо ў гэтым годзе, прынамсі мы ставім такую задачу, што 10 рэзідэнтаў павінны пабудавацца, а 25 - пачаць будаўніцтва (сваіх прадпрыемстваў. - Заўвага БЕЛТА)", - сказаў намеснік кіраўніка Адміністрацыі Прэзідэнта.

Мікалай Снапкоў адзначыў, што сітуацыя, у якой на паперы рэзідэнт ёсць, а на самай справе будаўніцтва яшчэ не пачалося, беларускі бок непакоіць. "Таму на Савеце акцыянераў, які адбыўся ў сакавіку, мы для сябе вызначылі дакладны алгарытм дзеянняў. Ёсць пэўны часавы рэгламент, калі яны павінны пачаць будавацца і запусціць вытворчасць на поўную магутнасць. Калі гэта будзе выконвацца, то яны рэзідэнтамі застануцца. Калі не, то проста не будуць займаць зямлю, таму што на гэты момант попыт высокі", - дадаў ён.

Індустрыяльны парк - адзін з элементаў усебаковага стратэгічнага супрацоўніцтва з Кітаем, які застанецца наступным пакаленням. "Можна сказаць, што цяпер пачатак яго бурнага развіцця. 354 га, першая зона асваення - гэта крыху менш як 20 працэнтаў ад таго, што будзе выкарыстана рэзідэнтамі. Прэзідэнт даў дакладны імпульс, што тут павінны быць прадпрыемствы, якія будуць фарміраваць эканоміку будучага", - рэзюмаваў Мікалай Снапкоў.