Бізнес-навіны

Дзесяць прадпрыемстваў Мінпрама прэзентуюць прадукцыю на ІІ Узбекска-беларускім жаночым бізнес-форуме

Фота з архiва

20 жніўня, Мінск /Кар. БЕЛТА/. На ІІ Узбекска-беларускім жаночым бізнес-форуме сваю прадукцыю прэзентуюць 10 прадпрыемстваў Міністэрства прамысловасці. Аб гэтым карэспандэнту БЕЛТА расказалі ў прэс-службе ведамства.

У прыватнасці, прадпрыемствы прадставяць прадукцыю ў калектыўнай экспазіцыі Мінпрама ў рамках выстаўкі-прэзентацыі. На адкрытай пляцоўцы будзе прэзентаваны трохвосевы самазвал МАЗ-65012К, які працуе на газаматорным паліве (сціснуты газ), грузападымальнасцю 18,5 т. Гэта кааперацыйны прадукт, распрацаваны сумесна з ПАТ "Газпрам" у рамках праграмы пашырэння і прымянення рухавікоў на газаматорным паліве. У аўтамабілі прыменены балоны вытворчасці "Газсэрвіскампазіт" (г. Ніжні Ноўгарад, РФ), арматура вытворчасці ТАА "Газпрам газаматорныя сістэмы" (РФ). Спецыялізаваны рухавік вырабляецца на сумесным беларуска-кітайскім прадпрыемстве ў індустрыяльным парку "Вялікі камень". Вядзецца работа па адаптацыі рухавіка расійскай вытворчасці кампаніі "РарыТЭК".

На закрытай пляцоўцы ў калектыўнай экспазіцыі Мінпрама таксама будуць прадэманстраваны найноўшыя ўзоры прадукцыі: прадукцыя медыцынскага прызначэння ААТ "Інтэграл" і холдынга БелОМА, самы вялікі тэлевізар у Беларусі з дыяганаллю 100 цаляў, а таксама ноўтбукі і іншая прадукцыя ААТ "Н Холдынг", маштабны макет трамвая мадэлі Е811 (М 1:20) ААТ "УКХ БКМ", а таксама дызель-генератарныя ўстаноўкі ААТ "Мінскі маторны завод". Шэраг прадпрыемстваў прадставіць рэкламную прадукцыю і каталогі на агульнай экспазіцыі Міністэрства прамысловасці.

На палях форуму адбудуцца секцыйныя пасяджэнні па такіх напрамках, як сельскагаспадарчая і харчовая прамысловасць, машынабудаванне, электратэхнічная прамысловасць, электраэнергетыка і зялёная эканоміка і інш. У рамках секцыйных пасяджэнняў выступяць прадстаўніцы жаночай бізнес-супольнасці.

версія для друку

зрабіць стартавай

дабавіць у выбранае