Бізнес-навіны
Дэпутаты прынялі ў першым чытанні законапраект аб рэспубліканскім бюджэце на 2024 год
1 лістапада, Мінск /Кар. БЕЛТА/. Дэпутаты на пасяджэнні дзясятай сесіі Палаты прадстаўнікоў сёмага склікання прынялі ў першым чытанні законапраект "Аб рэспубліканскім бюджэце на 2024 год", перадае карэспандэнт БЕЛТА.
Праект закона ўнесены на разгляд Палаты прадстаўнікоў Саветам Міністраў. Законапраект у Авальнай зале прадставіў міністр фінансаў Юрый Селіверстаў.
Праект рэспубліканскага бюджэту і разліковыя паказчыкі па бюджэтах абласцей і г. Мінска на 2024 год распрацаваны на аснове палажэнняў праграмных дакументаў па сацыяльна-эканамічным развіцці краіны з улікам існуючай эканамічнай сітуацыі. Ключавой задачай развіцця Рэспублікі Беларусь у 2024 годзе будзе з'яўляцца захаванне ўстойлівасці бюджэтнай сістэмы, безумоўнае выкананне ўсіх даўгавых абавязацельстваў, выкарыстанне сродкаў бюджэту ў адпаведнасці з прыярытэтамі сацыяльна-эканамічнага развіцця і павышэнне на гэтай аснове дабрабыту беларускага народа.
"Даходы кансалідаванага бюджэту на 2024 год ацэньваюцца ў суме Br67,5 млрд, або 106,3 працэнта да бягучага года", - расказаў міністр.
Даходы па праекце рэспубліканскага бюджэту на 2024 год прадугледжваюцца ў суме Br39,9 млрд, або 102,8 працэнта да ацэнкі паступленняў 2023 года. Асноўныя крыніцы падатковых даходаў рэспубліканскага бюджэту - падатак на дабаўленую вартасць, акцызы, падатковыя даходы ад знешнеэканамічнай дзейнасці.
"Расходы кансалідаванага бюджэту на будучы фінансавы год вызначаны ў суме Br72,7 млрд, або 112,1 працэнта да 2023 года, рэспубліканскага бюджэту - Br44,7 млрд, або 113,9 працэнта", - адзначыў Юрый Селіверстаў.
У 2024 годзе асноўнымі задачамі для сектара дзяржаўных фінансаў з'яўляюцца забеспячэнне эканамічнага росту на аснове павышэння эфектыўнасці выкарыстання знешніх і ўнутраных рэсурсаў і скарачэння рэгіянальных дыспрапорцый. Захаваецца сацыяльная накіраванасць расходаў бюджэту. У прыярытэце - фінансаванне адукацыі і аховы здароўя, а таксама рэалізацыя мер, накіраваных на павышэнне якасці жыцця насельніцтва, падтрымку шматдзетных сем'яў. Прадугледжана фарміраванне сямейнага капіталу ў суме Br382,5 млн. Значную частку ў бюджэце складуць расходы на аплату працы, пенсіі, стыпендыі, дапамогі, іншыя выплаты, сродкі на выкананне дзяржаўных сацыяльных стандартаў.
На 2024 год фарміраванне праекта рэспубліканскага бюджэту праведзена з дэфіцытам у памеры Br4,75 млрд.
версія для друку
зрабіць стартавай
дабавіць у выбранае