Бізнес-навіны

Чым БРІКС цікавы Беларусі і што Беларусь можа прапанаваць БРІКС. Думка эканаміста

23 кастрычніка, Мінск /Кар. БЕЛТА/. Эканамічны аналітык, кандыдат эканамічных навук Георгій Грыц у YouTube-праекце БЕЛТА "Па факце: рашэнні Першага" расказаў, чым БРІКС цікавы Беларусі і што Беларусь можа прапанаваць БРІКС.

"На інтарэсы БРІКС неабходна глядзець з пункту гледжання праектаў, якія ініцыююцца ўнутры арганізацыі. Напрыклад, сёння вельмі актуальнае пытанне валютна-фінансавых разлікаў у міжнародным гандлі. Міжнародныя структуры і інстытуты сёння не працуюць - гэта вынік санкцый. Таму праекты па стварэнні альтэрнатыўнай плацежнай сістэмы, стварэнні наднацыянальнай валюты, якія сёння вельмі актыўна абмяркоўваюцца ў БРІКС, адназначна цікавыя Рэспубліцы Беларусь", - сказаў Георгій Грыц.

Ён таксама адзначыў структуру беларускай эканомікі - большая частка прадукцыі пастаўляецца на экспарт. "Стварэнне роўных, канкурэнтных умоў для экспарту і імпарту таксама актуальна", - падкрэсліў эканаміст.

Паводле яго слоў, Беларусі цікавы рынак БРІКС і з пункту гледжання паставак прадуктаў харчавання. У гэтым плане не можа не прыцягваць расійская ініцыятыва па стварэнні новай аграрнай біржы на прасторы арганізацыі.

"Гэта значыць, БРІКС - не толькі штогадовы саміт кіраўнікоў дзяржаў. У арганізацыі існуе шэраг інструментаў і пляцовак для супрацоўніцтва: савет экспертных цэнтраў, Новы банк развіцця, фонд фінансавай падтрымкі. Напрыклад, Новы банк развіцця за час свайго існавання прафінансаваў праектаў на $30 млрд, гэта каля 100 праектаў. Для Беларусі гэты напрамак таксама вельмі актуальны", - лічыць Георгій Грыц.

А што можа прапанаваць БРІКС сама Беларусь? "Возьмем прадукты харчавання: хто б гадоў 15-20 таму сказаў, што Беларусь будзе канкурыраваць па малочнай прадукцыі з Новай Зеландыяй? Напэўна, ніхто не паверыў бы. Калійныя ўгнаенні: мы ўваходзім у спіс вядучых вытворцаў. Тое ж самае можна гаварыць пра патэнцыял з пункту гледжання экалогіі і кліматалогіі: Беларусь - адна з крыніц прыроднай чыстай вады, я ўжо не кажу пра лясныя ўгоддзі", - прывёў некалькі прыкладаў эканаміст.

Беларусь гатова ўнесці свой уклад і ў агульную справу па забеспячэнні ўстойлівага развіцця. "Сёння Беларусь лічыцца адным з лідараў па рэалізацыі гэтых мэт Арганізацыі Аб'яднаных Нацый: мы займаем 30-е месца сярод 166 краін. Гэта сапраўды вялікае дасягненне. Запатрабаваны і вопыт Беларусі па стварэнні сацыяльна арыентаванай эканомікі. Чалавек заўсёды павінен быць у аснове палітыкі як такой, і эканомікі ў прыватнасці", - падагульніў эксперт.

версія для друку

зрабіць стартавай

дабавіць у выбранае