Бізнес-навіны

Чарвякоў: сярод нашых краін-партнёраў Узбекістан уваходзіць у дзясятку па аб'ёме тавараабароту

6 верасня, Мінск /Кар. БЕЛТА/. Сярод нашых краін-партнёраў Узбекістан уваходзіць у дзясятку па аб'ёме тавараабароту, заявіў міністр эканомікі Аляксандр Чарвякоў у час пленарнага пасяджэння першага беларуска-ўзбекскага жаночага бізнес-форуму на тэму "Жанчыны ў бізнесе - патэнцыял для развіцця дзелавога супрацоўніцтва Беларусі і Узбекістана", перадае карэспандэнт БЕЛТА.

"Сярод краін-партнёраў Рэспублікі Беларусь Узбекістан уваходзіць у дзясятку па аб'ёме тавараабароту - больш за $500 млн (у 2022 годзе. - Заўвага БЕЛТА) і займае сёмае месца ў экспарце краіны. Аснову беларускага экспарту ва Узбекістан складае мяса-малочная прадукцыя, тавары з дрэва, фармацэўтычныя прадукты, трактары, седлавыя цягачы і гэтак далей. У той жа час імпарт тавараў з Узбекістана больш дыверсіфікаваны. У 2022 годзе яго аснову складала прадукцыя лёгкай прамысловасці, агародніна, садавіна, медны дрот, трубы і гэтак далей, - расказаў Аляксандр Чарвякоў. 

У Беларусі сёння створаны 84 арганізацыі з узбекскім капіталам у галіне вытворчасці спецаўтатэхнікі, трактароў, абутку. "Ва Узбекістане зарэгістравана больш за 100 прадпрыемстваў, заснавальнікамі якіх з'яўляюцца рэзідэнты Рэспублікі Беларусь. Адкрыта прадстаўніцтва кампаній у сферы міжнародных перавозак, распрацоўкі праграмнага забеспячэння, вытворчасці лекавых сродкаў і ветпрэпаратаў. У 2022 годзе ў Ташкенце адкрылася сумеснае прадпрыемства па вытворчасці малочнай прадукцыі. Асартымент тавараў шырокі, і нам трэба працаваць далей, ствараць новыя вытворчасці і пашыраць наменклатуру ўзаемнага гандлю", - адзначыў міністр.

Па запрашэнні Савета Рэспублікі Нацыянальнага сходу Рэспублікі Беларусь краіну з афіцыйным візітам наведвае парламенцкая дэлегацыя Рэспублікі Узбекістан на чале са старшынёй Сената Олій Мажліса Танзілой Нарбаевай. У час візіту арганізавана правядзенне першага беларуска-ўзбекскага жаночага бізнес-форуму. У рамках форуму напярэдадні прайшлі секцыйныя пасяджэнні. Цяпер праходзіць ключавое мерапрыемства бізнес-форуму - пленарнае пасяджэнне на тэму "Жанчыны ў бізнесе - патэнцыял для развіцця дзелавога супрацоўніцтва Беларусі і Узбекістана"

Арганізатар форуму - Савет Рэспублікі Нацыянальнага сходу Рэспублікі Беларусь.

версія для друку

зрабіць стартавай

дабавіць у выбранае