Бізнес-навіны
БУТБ спрашчае акрэдытацыю для турэцкіх кампаній
Фота з архiва
1 снежня, Мінск /Кар. БЕЛТА/. Беларуская ўніверсальная таварная біржа спрашчае акрэдытацыю для турэцкіх кампаній, паведамілі БЕЛТА ў прэс-службе БУТБ.
У мэтах павышэння прывабнасці біржавога механізма для замежных кампаній, у тым ліку патэнцыяльных пакупнікоў паліўных гранул (пелет) і іншай прадукцыі дрэваапрацоўкі, Беларуская ўніверсальная таварная біржа ўводзіць спрошчаную працэдуру акрэдытацыі для рэзідэнтаў Турцыі. Каб атрымаць электронны лічбавы подпіс і стаць удзельнікам біржавых таргоў, турэцкай кампаніі дастаткова прадаставіць БУТБ мінімальны пакет дакументаў. Пры гэтым сама працэдура акрэдытацыі ажыццяўляецца дыстанцыйна праз інтэрнэт і звычайна займае ўсяго адзін рабочы дзень.
"У ходзе падрыхтоўкі да пілотных біржавых таргоў пелетамі на рынак Турцыі пры садзейнічанні пасольства Беларусі ў гэтай краіне забяспечана магчымасць спрошчанай акрэдытацыі турэцкіх кампаній на біржавой пляцоўцы. Для гэтага рэзідэнту Турцыі трэба загрузіць у асабістым кабінеце на сайце біржы толькі два электронныя дакументы - копію выпіскі з гандлёвага рэестра, перакладзеную на англійскую, рускую або беларускую мовы, а таксама копію старонкі пашпарта кіраўніка кампаніі з ідэнтыфікацыйнымі данымі. На праверку дакументаў, выпуск электроннага подпісу і падпісанне дагавора на біржавое абслугоўванне патрэбны адзін рабочы дзень. Спрошчаны парадак акрэдытацыі ўжо дзейнічае адносна рэзідэнтаў 21 краіны, што робіць біржавы механізм больш даступным для замежных кампаній і садзейнічае росту паставак беларускіх тавараў на гэтыя рынкі", - пракаменціравалі ў прэс-службе БУТБ.
Першыя экспартныя таргі паліўнымі грануламі (пелетамі), арыентаваныя на рынак Турцыі, пройдуць на БУТБ 6 снежня. На будучую гандлёвую сесію беларускія вытворцы ўжо выставілі больш за 18 тыс. куб.м пелет гатункаў А1 (светлыя пелеты) і А2 (шэрыя пелеты), у тым ліку з дастаўкай да спажыўцоў. Цяпер вядзецца работа па прыцягненні на таргі і навучанні турэцкіх пакупнікоў.
версія для друку
зрабіць стартавай
дабавіць у выбранае