Бізнес-навіны

БУТБ прадставіла магчымасці біржавога гандлю на эканамічных форумах у Варонежы

Фота з архiва

25 сакавіка, Мінск /Кар. БЕЛТА/. Магчымасці Беларускай універсальнай таварнай біржы ў сферы трансгранічнага біржавога гандлю былі прадстаўлены на міжрэгіянальным форуме "Імпарт і экспарт: магчымасці, інструменты, практыкі" і міжрэгіянальным спецыялізаваным транспартна-лагістычным форуме Чарназем'я, якія прайшлі ў Варонежскім індустрыяльным парку "Перспектыва". Аб гэтым паведамілі БЕЛТА ў прэс-службе БУТБ.

Выступаючы ў тэматычнай секцыі E-commerce (анлайн-гандаль), начальнік упраўлення знешнеэканамічнай дзейнасці БУТБ Аляксандр Башлій падрабязна асвяціў практычныя аспекты прымянення біржавога механізма пры прасоўванні на экспарт прадукцыі прадпрыемстваў Цэнтральна-Чарназёмнага эканамічнага раёна Расійскай Федэрацыі. Асаблівы акцэнт быў зроблены на спрошчанай працэдуры акрэдытацыі для рэзідэнтаў РФ, кантролі выканання здзелак, інструментах па зніжэнні рызык, а таксама комплекснай інфармацыйнай і маркетынгавай падтрымцы з боку біржы. Паводле слоў прадстаўніка БУТБ, у таргах удзельнічаюць кампаніі амаль з усіх абласцей Чарназем'я, выкарыстоўваючы біржавую платформу як у экспартных, так і ў імпартных мэтах.

"Калі ўзяць экспартны напрамак, то даволі актыўна ў гэтым годзе працуюць кампаніі з Варонежскай і Ліпецкай абласцей, пастаўляючы ў Беларусь харчовую пшаніцу і фуражны ячмень. Белгародская вобласць таксама прыкметна нарасціла аб'ёмы экспарту на беларускі рынак. У асноўным гэта стальныя металаканструкцыі і электраабсталяванне. Што датычыцца імпарту з Беларусі, то лідарамі па гэтым паказчыку цяпер з'яўляюцца Варонежская і Белгародская вобласці. У першым выпадку размова ідзе аб закупках сметанковага масла, сухога малака і піламатэрыялаў, а ў другім - зноў жа аб піламатэрыялах, мясапрадукцыі і ломе каляровых металаў. Інакш кажучы, бізнес Чарназем'яў паступова ўключаецца ў біржавы гандаль з Беларуссю, прычым для некаторых кампаній біржавая пляцоўка становіцца не дадатковым, а асноўным каналам закупак і дыстрыбуцыі ў Беларусі", - падкрэсліў Аляксандр Башлій.

Начальнік упраўлення ЗЭД БУТБ таксама прыняў удзел у круглым стале "Лічбавізацыя транспартнай лагістыкі Чарназем'я", расказаўшы, як ажыццяўляецца дастаўка біржавых тавараў у блізкае і далёкае замежжа і якія лагістычныя маршруты найбольш запатрабаваны ў 2024 годзе.

версія для друку

зрабіць стартавай

дабавіць у выбранае