Бізнес-навіны

БУТБ плануе развіваць біржавы гандаль малочнай прадукцыяй з Яраслаўскай вобласцю

Фота з архiва

13 ліпеня, Мінск /Кар. БЕЛТА/. Экспарт беларускага сметанковага масла і сухога малака ў Яраслаўскую вобласць плануецца арганізаваць праз пляцоўку Беларускай універсальнай таварнай біржы. Адпаведная дамоўленасць дасягнута па выніках візіту ў цэнтральны офіс БУТБ дэлегацыі дзелавых колаў з гэтага рэгіёна Расіі, паведамілі БЕЛТА ў прэс-службе біржы.

У прыватнасці, кіраўніцтва аднаго з вядучых вытворцаў кісламалочных прадуктаў і марожанага Яраслаўскай вобласці выказала зацікаўленасць у закупцы вялікіх аб'ёмаў сметанковага масла і сухога абястлушчанага малака на біржавых таргах для задавальнення патрэбнасцей прадпрыемства ў высакаякаснай сыравіне. Пры гэтым таксама разглядаецца магчымасць выкарыстоўваць біржавую платформу для продажу гатовай прадукцыі расійскай вытворчасці ў Кітай з прымяненнем механізма транзітных здзелак.

Намеснік старшыні праўлення БУТБ Аляксей Мацэвіла падкрэсліў гатоўнасць біржы садзейнічаць у выхадзе на рынак як Беларусі, так і трэціх краін, з якімі ў БУТБ ужо ёсць станоўчы вопыт узаемадзеяння. Паводле яго слоў, у гэтым годзе біржавы экспарт сметанковага масла ў Расію расце рэкорднымі тэмпамі. Па выніках паўгоддзя пастаўкі павялічыліся больш як у шэсць разоў, прычым і ў натуральным, і ў вартасным выражэнні. "Брэнд "Зроблена ў Беларусі" садзейнічае продажам, і попыт з боку расійскіх пакупнікоў цяпер вельмі высокі. Разам з тым мы гатовы не толькі забяспечыць ваша прадпрыемства сыравінай, але і дапамагчы з экспартам гатовай прадукцыі. Наколькі мне вядома, Кітай - адзін з асноўных гандлёва-эканамічных партнёраў Яраслаўскай вобласці. Для нас гэта таксама прыярытэтны рынак, які мы з канца мінулага года актыўна і паспяхова асвойваем. Упэўнены, што акрэдытаваным на біржы кітайскім кампаніям будуць цікавыя вырабляемыя вамі тавары малочнай групы", - адзначыў прадстаўнік БУТБ.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае