Бізнес-навіны

БУТБ і ТЭК-Торг дамовіліся аб актывізацыі ўзаемадзеяння ў галіне электронных закупак

Фотa БУТБ

12 снежня, Мінск /Кар. БЕЛТА/. Беларуская ўніверсальная таварная біржа і расійская федэральная электронная гандлёвая пляцоўка ТЭК-Торг дамовіліся аб актывізацыі ўзаемадзеяння ў галіне дзяржаўных і карпаратыўных электронных закупак, паведамілі БЕЛТА ў прэс-службе БУТБ.

У якасці перспектыўных напрамкаў супрацоўніцтва бакі вызначылі абмен вопытам, інфармацыяй і тэхналогіямі, спрашчэнне ўзаемнага доступу да закупачных працэдур, што праводзяцца на пляцоўках БУТБ і ТЭК-Торг, рэалізацыю сумесных праектаў, якія садзейнічаюць далейшай лічбавізацыі і аўтаматызацыі гандлёва-закупачнай дзейнасці ў Беларусі і Расіі.

У ходзе перагавораў былі, у прыватнасці, закрануты прынцыпы работы і ключавыя функцыянальныя магчымасці беларускай і расійскай электронных платформ, прымяняемыя БУТБ і ТЭК-Торг праграмна-тэхнічныя рашэнні і дадатковыя інструменты і сэрвісы, што прадастаўляюцца пастаўшчыкам і заказчыкам. Пры гэтым асноўная ўвага была ўдзелена тэме закупак за кошт уласных сродкаў арганізацый. Прадстаўнікоў ТЭК-Торг асабліва зацікавілі такія ноу-хау БУТБ, як "цёмны перыяд" пры правядзенні біржавых таргоў прамысловымі і спажывецкімі таварамі, што дае магчымасць максімізаваць эканамічны эфект і звесці да нуля рызыку змовы паміж бакамі здзелкі, а таксама выкарыстанне кодаў GTIN для аўтаматычнага фарміравання заявак на куплю і продаж у гандлёвай сістэме біржы.

Акрамя гэтага, БУТБ і ТЭК-Торг падзяліліся сваім унікальным вопытам і напрацоўкамі ў сферы імпартазамяшчэння, адзначыўшы актуальнасць гэтага пытання ў кантэксце развіцця прамысловай кааперацыі і неабходнасці ўмацавання дзелавых кантактаў паміж беларускімі і расійскімі прадпрыемствамі, уключаючы суб'ектаў малога і сярэдняга прадпрымальніцтва.

З мэтай дэталёвай прапрацоўкі акрэсленых напрамкаў узаемадзеяння і пераводу іх у практычную плоскасць у пачатку наступнага года плануецца арганізаваць сустрэчу на ўзроўні экспертаў БУТБ і ТЭК-Торг, па выніках якой будуць вызначаны канкрэтныя мерапрыемствы ў рамках стратэгічнага партнёрства паміж бакамі.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. Беларуская ўніверсальная таварная біржа - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае