Бізнес-навіны

Будаўніцтва, кааперацыя, мультыбрэндавы цэнтр. Беларусь і Смаленская вобласць абмеркавалі новыя праекты

Фота Пасольства Рэспублікі Беларусь у Расійскай Федэрацыі

4 снежня, Масква /Эдуард Півавар - БЕЛТА/. Пасол Беларусі ў Расіі Дзмітрый Крутой 4 снежня ў час візіту ў Смаленскую вобласць сустрэўся з губернатарам рэгіёна Васілём Анохіным. Па ініцыятыве Дзмітрыя Крутога ў перагаворах таксама прынялі ўдзел старшыня Віцебскага аблвыканкама Аляксандр Субоцін і першы намеснік міністра архітэктуры і будаўніцтва Беларусі Алег Швец, паведамілі БЕЛТА ў прэс-службе пасольства.

Бакі абмеркавалі шырокі спектр пытанняў супрацоўніцтва ў сферах эканомікі, машынабудавання, сельскай гаспадаркі, дарожнага будаўніцтва, адукацыі, культуры. Так, Васіль Анохін канстатаваў, што ў І паўгоддзі гэтага года назіралася дадатная дынаміка па аб'ёме тавараабароту з Беларуссю, які дасягнуў $1 млрд 292 млн. На тэрыторыі Смаленскай вобласці зарэгістраваны і функцыянуюць больш як 4,5 тыс. прадпрыемстваў з беларускім капіталам. Яны ажыццяўляюць сваю дзейнасць у сферы дарожнага будаўніцтва, транспартнай лагістыкі, ільнаводства, прамысловасці.

На сустрэчы была ўдзелена ўвага інтэнсіфікацыі ўдзелу беларускіх кваліфікаваных кадраў у рэалізацыі розных праектаў на тэрыторыі Смаленскай вобласці. Цяпер у шэрагу раёнаў рэгіёна ўжо задзейнічаны беларускія падрадчыкі для правядзення работ па дарожным будаўніцтве, добраўпарадкаванні паркаў, сквераў. Дзмітрый Крутой паведаміў аб гатоўнасці беларускага боку актывізаваць удзел у будаўніцтве сацыяльных аб'ектаў, рэканструкцыі дарог і маставых збудаванняў у Смаленскай вобласці.

"Асобнай тэмай абмеркавання стала закупка грамадскага транспарту, дарожнай, будаўнічай, сельскагаспадарчай тэхнікі ў беларускіх вытворцаў. У гэтым годзе ўжо набыта 45 аўтобусаў МАЗ. Таксама ў планах закупка больш як 100 адзінак тэхнікі АМКАДОР, МАЗ, МТЗ. Акрамя таго, з улікам патрэбнасцей вобласці ў мадэрнізацыі парку сельскагаспадарчай, грузавой, пасажырскай і іншай тэхнікі беларускі бок гатовы прымаць неабходныя меры для стварэння зборачных вытворчасцей. Таксама абмеркавалі перспектывы стварэння ў рэгіёне мультыбрэндавага цэнтра абслугоўвання беларускай тэхнікі, якой становіцца ўсё больш у Смаленскай вобласці", - расказалі ў прэс-службе.

У сферы сельскай гаспадаркі абмяркоўвалася пытанне супрацоўніцтва вядучага льнасеяльнага прадпрыемства Смаленскай вобласці ТАА "Рускі лён" з прадстаўнікамі Беларусі ў стварэнні сумеснага селекцыйна-насенняводчага цэнтра канкурэнтаздольных сартоў лубяных культур (у прыватнасці, лёну-даўгунцу) на базе прадпрыемства.

"Што датычыцца турызму, то ў 2022 годзе Смаленскую вобласць наведалі больш як 50 тыс. турыстаў з Беларусі. У сувязі з гэтым абмяркоўвалася стварэнне першага міжнароднага турысцка-інфармацыйнага цэнтра Саюзнай дзяржавы на тэрыторыі Смаленска. Канцэпцыя праекта ўжо атрымала падтрымку ад Міністэрства эканомікі Беларусі і Міністэрства эканамічнага развіцця Расіі, прынята рашэнне аб выдзяленні грашовых сродкаў у 2024-2025 гадах. Яшчэ адзін напрамак для супрацоўніцтва - школьны турызм. Разглядалася магчымасць арганізацыі перакрыжаваных турыстычных маршрутаў патрыятычнай і гістарычнай накіраванасці для школьнікаў з Беларусі і Расіі. Размова ішла і аб запуску сеткавай адукацыйнай праграмы Смаленскага дзяржаўнага ўніверсітэта і Віцебскага тэхналагічнага ўніверсітэта па падрыхтоўцы бакалаўраў па напрамках "тэхналогія і праектаванне тэкстыльных вырабаў" і "дызайн касцюма і тканін", - адзначылі ў дыпмісіі.

У рамках святкавання 1160-годдзя Смаленска і 80-й гадавіны вызвалення Смаленскай вобласці ад фашысцкіх захопнікаў актыўны ўдзел ва ўрачыстых мерапрыемствах прынялі і беларускія творчыя калектывы. "Выказваю вялікую ўдзячнасць за тое, што беларускія творчыя калектывы прынялі ўдзел у святкаванні 1160-годдзя Смаленска. Для папулярызацыі нашай сумеснай культуры мы хацелі б запрасіць вашы калектывы і на святкаванне адной з самых значных і важных для вобласці падзей - 90-годдзе з дня нараджэння Юрыя Аляксеевіча Гагарына", - адзначыў Васіль Анохін.

У час візіту Дзмітрый Крутой таксама наведаў Сафонаўскі электрамашынабудаўнічы завод (СЭЗ) канцэрна "Русэлпрам", дзе вырабляюць электрарухавікі для мноства галін прамысловасці. Сафонаўскі завод цікавы ў першую чаргу наладжанай кааперацыяй з ААТ "БЕЛАЗ", які забяспечвае да палавіны загрузкі завода. "Кароткае лагістычнае плячо і ўзаемны характар паставак паміж прадпрыемствамі холдынга "БЕЛАЗ" і СЭЗ даюць магчымасць разлічваць на паглыбленне кааперацыі, у тым ліку па актуальных задачах імпартазамяшчэння. Напрыклад, ужо да лета СЭЗ зможа ў кааперацыі з "БЕЛАЗам" імпартазамясціць электрарухавікі і прыводы для канатных дарог. Колькасць такіх дарог у Расіі большая за 7 тыс.", - дадалі ў прэс-службе.

версія для друку

зрабіць стартавай

дабавіць у выбранае