Бізнес-навіны

Будаўніцтва і зборачная вытворчасць: Галоўчанка аб планах супрацоўніцтва з Уладзімірскай вобласцю

17 мая, Мінск /Кар. БЕЛТА/. Прэм'ер-міністр Беларусі Раман Галоўчанка расказаў аб планах работы і перспектыўных напрамках супрацоўніцтва з Уладзімірскай вобласцю Расіі ў час сустрэчы з губернатарам расійскага рэгіёна Аляксандрам Аўдзеевым, перадае карэспандэнт БЕЛТА.

У рамках візіту дэлегацыі Уладзімірскай вобласці праходзіць шэраг мерапрыемстваў, у тым ліку з удзелам дзелавых колаў абедзвюх краін, адзначыў Раман Галоўчанка. "Напрыклад, у гэтыя дні праходзіць Беларуска-расійскі інвестыцыйна-кааперацыйны форум паміж прадпрыемствамі Беларусі і Уладзімірскай вобласці. Усе гэтыя мерапрыемствы павінны выбудаваць гарызантальныя сувязі, якія і без таго дастаткова насычаныя і плённыя. У ходзе такіх мерапрыемстваў абавязкова знаходзяцца новыя варыянты для ўзаемадзеяння", - упэўнены прэм'ер-міністр.

Кіраўнік урада таксама нагадаў, што нядаўна прайшло пасяджэнне рабочай групы па супрацоўніцтве Беларусі і Уладзімірскай вобласці Расіі, на якім прадметна абмеркаваны пытанні ўзаемнага супрацоўніцтва. Міністр эканомікі Аляксандр Чарвякоў праінфармаваў прэм'ер-міністра аб выніках гэтай сустрэчы.

"Таксама хацеў бы акцэнтаваць увагу на тых праектах, якія бачацца найбольш важнымі для сумеснай рэалізацыі ў будучым. Хацелася б больш падрабязна абмеркаваць праект па стварэнні зборачнай вытворчасці беларускай сельскагаспадарчай і камунальнай тэхнікі. Сёння можна прыняць адпаведнае рашэнне", - канстатаваў Раман Галоўчанка.

Акрамя таго, прэм'ер-міністр адзначыў, што ў Беларусі і Уладзімірскай вобласці ёсць добры патэнцыял для развіцця супрацоўніцтва ў будаўнічай сферы. "Беларусь можа прыняць удзел у будаўніцтве аб'ектаў у расійскім рэгіёне з улікам маштабных планаў. Гэта будаўніцтва не толькі жылога фонду і сацыяльных аб'ектаў, але і рэканструкцыя, мадэрнізацыя дарожнай сеткі, да таго ж у нас ужо ёсць добры вопыт у гэтым напрамку", - запэўніў ён.

Наконт сацыяльных аб'ектаў Раман Галоўчанка дадаў, што беларускія будаўнікі таксама маюць вялікі вопыт будаўніцтва, які будзе цікавы Уладзімірскай вобласці. "З 2018 па 2022 год у Калужскай вобласці было ўзведзена 13 сацыяльных аб'ектаў - 7 школ і 6 дзіцячых садоў. Будаваўся дзіцячы сад і ў Санкт-Пецярбургу, літаральна гэтымі  днямі адбылася яго перадача гораду. У Варонежскай вобласці рэалізуецца праект па будаўніцтве школы амаль на 3 тыс. месцаў з рэкордна кароткімі тэрмінамі ўзвядзення. Мы ўзялі на сябе абавязацельствы ўдвая скараціць тэрміны планавага ўзвядзення такога аб'екта", - прывёў некалькі прыкладаў ён. І дадаў: "Такі тып супрацоўніцтва нам знаёмы і не выклікае нараканняў з боку партнёраў".

Таксама Беларусі цікава супрацоўніцтва з расійскім рэгіёнам у сферы сельскай гаспадаркі і абыходжання з камунальнымі адходамі.

версія для друку

зрабіць стартавай

дабавіць у выбранае