Бізнес-навіны

Брыло: у выстаўцы "Белагра" прымуць удзел больш за 400 кампаній

Фота з архiва

3 чэрвеня, Мінск /Кар. БЕЛТА/. Міністр сельскай гаспадаркі і харчавання Ігар Брыло расказаў на прэс-канферэнцыі аб удзельніках выстаўкі "Белагра-2022" і плануемых новаўвядзеннях, перадае карэспандэнт БЕЛТА.

"Другі год запар у выставачным цэнтры індустрыяльнага парка "Вялікі камень" пройдзе міжнародная выстаўка "Белагра". Сярод арганізатараў будзе не толькі Мінсельгасхарч, але і нашы калегі з канцэрнаў і дзяржорганаў. У прыватнасці, вялікую падтрымку мы адчуваем ад Міністэрства прамысловасці. Традыцыйна будзе прадстаўлена Нацыянальная акадэмія навук, канцэрн "Белдзяржхарчпрам" і "Белкаапсаюз", - расказаў Ігар Брыло.

Паводле яго слоў, на сёння свой удзел пацвердзілі каля 425 кампаній. Сярод краін-удзельніц - Беларусь, Расія, Германія, Польшча, Кітай, Таджыкістан, Казахстан, Манголія, Ірак, Нікарагуа і Куба. Беларускіх удзельнікаў будзе 319.

Міністр адзначыў, што акрамя традыцыйных экспазіцый сельскагаспадарчай тэхнікі, абсталявання і прадуктаў харчавання, міжнароднай выстаўкі "Белферма" і экспазіцыі рыбацкай вёскі будзе шэраг новаўвядзенняў. Напрыклад, упершыню прадставяць беларускую імпартазамяшчальную плодаагароднінную прадукцыю.

Яшчэ з новаўвядзенняў - плануецца ўзаемадзеянне з Міністэрствам абароны. На выстаўцы будзе прысутнічаць музычна-ваенны аркестр, а таксама будзе арганізаваны тэматычны стэнд з салдацкай кашай і чаем.

Як сказаў Ігар Брыло, будуць актыўна абмяркоўвацца і пытанні экспарту беларускай прадукцыі ў Расію: "Цяпер для нас гэта актуальнае пытанне, і ў сувязі з гэтым плануецца правядзенне шэрага мерапрыемстваў з Расійскай Федэрацыяй. На гэты момант прадстаўнікі з Расіі зацікаўлены ў нашай сельгастэхніцы, прадуктах і іншым, таму будзем абмяркоўваць пастаўкі ў гэтых напрамках".

Што датычыцца "Белагра", то ў выстаўцы ад расійскага боку будуць удзельнічаць больш за 30 рэгіёнаў і 16 асобных стэндаў. Сярод іх будуць прадстаўлены стэнды з Ліпецкай, Мурманскай, Новасібірскай, Смаленскай і іншых абласцей.

Таксама на выстаўцы плануецца ўдзел запрошаных гасцей, сярод якіх будуць міністры сельскай гаспадаркі Ірака, Нікарагуа, Кубы, Таджыкістана і іншых краін.

версія для друку

зрабіць стартавай

дабавіць у выбранае