Бізнес-навіны

"БКМ Холдынг" і "Расатам" плануюць рэалізоўваць новыя праекты ў сферы развіцця электратранспарту

Фота з архiва

7 чэрвеня, Мінск /Кар. БЕЛТА/. "БКМ Холдынг" і "Расатам" плануюць рэалізоўваць новыя сумесныя праекты ў сферы развіцця электратранспарту, паведамілі БЕЛТА ў дзяржкарпарацыі "Расатам".

На міжнароднай выстаўцы "Еўразія - наш дом" інтэгратар "Расатама" ў галіне сістэм накаплення электраэнергіі ТАА "РЭНЕРА", вядучы беларускі вытворца наземнага гарадскога электрычнага транспарту "БКМ Холдынг" і краінавы офіс ДК "Расатам" у Беларусі ТАА "Русатам Бел" падпісалі пагадненне аб стратэгічным супрацоўніцтве ў галіне рэалізацыі сумесных праектаў у сферы развіцця электратранспарту. Дакумент накіраваны на развіццё сумесных кампетэнцый і каардынацыю работы ўдзельнікаў па рэалізацыі праектаў у краінах Саюзнай дзяржавы і за мяжой.

У цырымоніі падпісання прынялі ўдзел генеральны дырэктар ТАА "РЭНЕРА" Аляксандр Камашоў, генеральны дырэктар ААТ "Кіруючая кампанія холдынга "Белкамунмаш" Тарас Мурог і дырэктар краінавага офіса ДК "Расатам" у Беларусі ТАА "Русатам Бел" Станіслаў Лявіцкі.

"РЭНЕРА" і "БКМ Холдынг" ужо маюць вопыт рэалізацыі паспяховых сумесных праектаў. У 2022 годзе быў заключаны дагавор на пастаўку літый-іонных акумулятарных батарэй для 97 тралейбусаў з павялічаным аўтаномным ходам. Паэтапная адгрузка камплектаў пачалася ў мінулым годзе і ўжо цяпер 81 тралейбус на літый-іоннай батарэі "РЭНЕРА" курсіруе па маршрутах Санкт-Пецярбурга.

"Мы гатовы да прадаўжэння сумесных праектаў з вядучым беларускім вытворцам электратранспарту "БКМ Холдынг". Расійскія літый-іонныя батарэі характарызуюцца надзейнасцю і бяспекай. Дзякуючы іх высокай энергаёмістасці запас ходу складае да 70 км, што дазваляе арганізаваць новыя транспартныя маршруты і зрабіць перамяшчэнне пасажыраў камфортным і бяспечным. Сінергія супрацоўніцтва паміж вытворцамі Расіі і Беларусі надасць дадатковы імпульс развіццю тэхналагічнага патэнцыялу і прамысловай кааперацыі ў галіне электратранспарту", - адзначыў Аляксандр Камашоў.

У сваю чаргу Тарас Мурог выказаў упэўненасць у доўгатэрміновым супрацоўніцтве. "Рынак электробусаў і тралейбусаў з павялічаным аўтаномным ходам у Расіі на гэты момант актыўна развіваецца, і дзякуючы гэтаму мы бачым вялікую колькасць магчымасцей далейшага развіцця нашага супрацоўніцтва з ТАА "РЭНЕРА", якое паказвае значны патэнцыял і перавагі прамысловай кааперацыі ў рамках Саюзнай дзяржавы", - сказаў ён.

Станіслаў Лявіцкі акцэнтаваў увагу на ўкараненні перадавых рашэнняў, накіраваных на зніжэнне экалагічнага ўздзеяння і забеспячэнне ўстойлівага развіцця. "Аб'яднанне вопыту і кампетэнцый абодвух бакоў садзейнічае распрацоўцы і ўкараненню інавацыйных праектаў, накіраваных на ўдасканаленне сістэмы электрамабільнага транспарту і павышэнне камфорту грамадзян", - заявіў ён.

версія для друку

зрабіць стартавай

дабавіць у выбранае