Бізнес-навіны

БКК дамовілася з Кітаем аб пастаўках калійных угнаенняў па $247 за тону

Фота з архiва

11 лютага, Мінск /Кар. БЕЛТА/. Беларуская калійная кампанія дамовілася з Кітаем аб пастаўках калійных угнаенняў па $247 за тону, паведамілі БЕЛТА ў прэс-службе БКК.

"10 лютага Беларуская калійная кампанія дасягнула пагаднення з кансорцыумам кітайскіх пакупнікоў (Sinochem, CNAMPGC, CNOOC) аб устанаўленні кантрактнай цаны ў памеры $247 за тону", - паведамілі ў прэс-службе.

Цана ўстаноўлена на 2021 год з тэрмінам пастаўкі да 31 снежня 2021 года.

У БКК лічаць, што такое пагадненне - гэта "наступны заканамерны крок ва ўмацаванні стабільнасці сусветнага рынку калію і пазітыўны сігнал для далейшага росту цэн у іншых рэгіёнах".

"Падпісанне новага кітайскага кантракта ўслед за заключаным індыйскім стварае трывалы фундамент для ўстойлівага попыту на калій і стымул для дадатнай цэнавай дынамікі. БКК выказвае ўдзячнасць кансорцыуму кітайскіх пакупнікоў за праведзеную плённую працу, якая дала магчымасць прыняць рашэнне, што адпавядае рэальнаму стану спраў на рынку і стымулюе яго далейшае гарманічнае развіццё", - дадалі ў прэс-службе.

ААТ "Беларуская калійная кампанія" заснавана ў 2013 годзе, з'яўляецца эксклюзіўным экспарцёрам калійных угнаенняў вытворчасці ААТ "Беларуськалій" і на працягу апошніх гадоў захоўвае ўпэўненае лідарства ў сусветным экспарце калійных угнаенняў. За гады сваёй дзейнасці БКК ажыццявіла пастаўкі беларускага калію амаль у 140 краін. КНР - буйнейшы спажывец калію ў свеце, кампаніі, якія ўваходзяць у кансорцыум кітайскіх пакупнікоў, з'яўляюцца доўгатэрміновымі партнёрамі БКК.

версія для друку

зрабіць стартавай

дабавіць у выбранае