Бізнес-навіны

19 мая, Мінск /Кар. БЕЛТА/. Канцэрн "Беллеспаперапрам" увядзе тры маштабныя імпартазамяшчальныя вытворчасці да канца 2015 года. Аб гэтым БЕЛТА паведамілі ў прэс-службе канцэрна.

Так, на РУП "Завод газетнай паперы" ствараецца вытворчасць паперы-асновы дэкаратыўных абліцовачных матэрыялаў магутнасцю 30 тыс. т у год. Прадугледжваецца, што гэту прадукцыю ўзамен імпартнай будуць закупляць айчынныя вытворцы ламініраваных драўняных пліт і падлогавых пакрыццяў. Новая вытворчасць будуецца пад ключ чэшскай кампаніяй Papcel. Аб'ём інвестыцый складае 69 млн еўра, з якіх 85 працэнтаў - звязаныя крэдыты еўрапейскіх банкаў.

На Добрушскай папяровай фабрыцы "Герой працы" ААТ "Кіруючая кампанія холдынга "Беларускія шпалеры" будуецца завод па выпуску мелаваных і немелаваных відаў кардону магутнасцю 200 тыс. т у год. З прадукцыі будуць вырабляцца ўпакоўкі для тавараў харчовай і фармацэўтычнай прамысловасці. Вытворчасць узводзіць кітайская карпарацыя "Сюань Юань". Кошт праекта ацэньваецца $348,6 млн. Фінансаванне ў памеры 100 працэнтаў кошту кантракта ажыццяўляецца за кошт сродкаў крэдыту Дзяржаўнага банка развіцця Кітая.

На Светлагорскім цэлюлозна-кардонным камбінаце ўзводзіцца завод па вытворчасці сульфатнай беленай цэлюлозы магутнасцю 400 тыс. т у год. Яго таксама пад ключ будуе кітайская кампанія China CAMC Engineering Co., LTD. Кошт праекта $769,6 млн, з іх 85 працэнтаў сродкаў крэдыту Экспартна-імпартнага банка Кітая. "Рэалізацыя гэтага маштабнага беларуска-кітайскага праекта дасць магчымасць закрыць патрэбнасці прадпрыемстваў цэлюлозна-папяровай прамысловасці Беларусі ў цэлюлозным валакне, а таксама наладзіць яго экспартныя пастаўкі", - паведамілі ў прэс-службе "Беллеспаперапрама".

На ўсіх аб'ектах актыўна вядуцца будаўнічыя работы. Тэрмін іх завяршэння - снежань бягучага года. Плануецца, што на поўную магутнасць новыя заводы запрацуюць у 2016 годзе.

Таксама ў прэс-службе "Беллеспаперапрама" расказалі, што ў ходзе рэалізацыі праграмы дзеянняў канцэрна па імпартазамяшчэнні забяспечаны выпуск прадукцыі па 30 таварных пазіцыях. Ажыццёўлена вытворчасць тавараў, якія вырабляліся ў Беларусі ў недастатковай колькасці або наогул не выпускаліся, а таксама тавараў, вытворчасць якіх наладжана па дзяржаўных, навукова-тэхнічных і галіновых (рэгіянальных) праграмах. Размова, у прыватнасці, ідзе аб драўняна-стружкавых і драўняна-валакністых плітах (у тым ліку МДФ/ХДФ), фанеры, розных відах паперы (упаковачная, абгортачная, муштуковая, аснова для парафінавання, аснова для пераплётнага матэрыялу). За кошт пастаўкі на ўнутраны рынак імпартазамяшчальнай прадукцыі ў І квартале 2015 года прадпрыемствы "Беллеспаперапрама" атрымалі ўмоўную эканомію валютных сродкаў у аб'ёме $17,6 млн.

Пры гэтым у канцэрне падкрэслілі, што аб'ёмы паставак імпартазамяшчальнай прадукцыі на ўнутраны рынак дэманструюць устойлівы рост. Напрыклад, калі ў І квартале 2014 года па дагаворы з Міністэрствам гандлю прадпрыемствамі канцэрна на ўнутраны рынак пастаўлена 1 946,0 ум. куб.м драўняна-стружкавых пліт, то ўжо ў аналагічным перыядзе 2015 года - 2 980,1 ум. куб.м.

У цэлым канцэрн "Беллеспаперапрам" у 2015 годзе за кошт рэалізацыі праектаў па тэхнічным пераўзбраенні і рэканструкцыі вытворчасцей плануе выпусціць імпартазамяшчальнай прадукцыі на суму больш як $400 млн.