Бізнес-навіны

БелГПП і Кенійская нацпалата гандлю і прамысловасці падпісалі пагадненне аб супрацоўніцтве

Фота БелГПП

16 ліпеня, Мінск /Кар. БЕЛТА/. Беларуская гандлёва-прамысловая палата і Кенійская нацыянальная палата гандлю і прамысловасці падпісалі пагадненне аб супрацоўніцтве. Свае подпісы пад дакументам паставілі кіраўнікі дзвюх арганізацый у час анлайн-сустрэчы з прадстаўнікамі кенійскіх дзелавых колаў, паведамляе БЕЛТА са спасылкай на сайт БелГПП.

"Каб пасадзейнічаць беларускім і кенійскім прадпрымальнікам у развіцці дзелавых сувязей, пашырэнні ўзаемавыгаднага супрацоўніцтва БелГПП і Кенійская нацыянальная палата гандлю і прамысловасці дамовіліся сумесна арганізоўваць бізнес-місіі, праводзіць выстаўкі, кірмашы, форумы, семінары і іншыя мерапрыемствы з удзелам бізнесу Беларусі і Кеніі, ажыццяўляць абмен камерцыйнымі прапановамі і інфармацыяй аб гандлёва-эканамічным патэнцыяле дзвюх краін, супрацоўнічаць у галіне міжнароднага арбітражу", - адзначылі ў палаце.

У анлайн-мерапрыемстве таксама прынялі ўдзел Надзвычайны і Паўнамоцны Пасол Беларусі ў Кеніі Павел Узяткін, прадстаўнікі Міністэрства сельскай гаспадаркі і харчавання Беларусі, Міністэрства замежных спраў Кеніі, ААТ "Банк развіцця Рэспублікі Беларусь", Інвестыцыйнага агенцтва Кеніі і больш за 50 прадстаўнікоў бізнесу дзвюх краін.

У ходзе сустрэчы бакі разгледзелі патэнцыяльныя магчымасці для пашырэння гандлёва-эканамічнага супрацоўніцтва ў аграпрамысловым сектары, харчовай прамысловасці, у галіне інфармацыйных тэхналогій, адукацыі, а таксама перспектывы стварэння сумесных вытворчасцей, арганізацыі паставак беларускай сельскагаспадарчай прадукцыі ў Кенію, імпарту кенійскіх кавы, чаю, свежых фруктаў і агародніны, сухафруктаў, бабовых культур. На мерапрыемстве былі прадстаўлены магчымасці Кеніі як гандлёва-лагістычнага хаба для беларускага бізнесу ва Усходняй і Цэнтральнай Афрыцы, інструменты фінансавання экспартных паставак беларускай тэхнікі ў краіны Афрыканскага кантынента.

Анлайн-сустрэча была арганізавана Беларускай гандлёва-прамысловай палатай сумесна з Кенійскай нацыянальнай палатай гандлю і прамысловасці пры падтрымцы пасольства Беларусі ў Кеніі.

версія для друку

зрабіць стартавай

дабавіць у выбранае