Бізнес-навіны

"БЕЛДЖЫ" працуе над павелічэннем лакалізацыі вытворчасці аўтамабіляў

1 лістапада, Мінск /Кар. БЕЛТА/. Беларускі вытворца легкавых аўтамабіляў СЗАТ "БЕЛДЖЫ" працуе над павелічэннем лакалізацыі айчыннага брэнда, паведаміў журналістам генеральны дырэктар прадпрыемства Генадзь Свідзерскі на адкрыцці аўтацэнтра BELGEE ў Мінску, перадае карэспандэнт БЕЛТА.

У верасні запушчана вытворчасць буйнагабарытных пластмасавых дэталей - бампераў. "Гэту работу прадаўжаем. У планах - поўная лакалізацыя сядзенняў, - расказаў Генадзь Свідзерскі, дадаўшы, што па гэтым пытанні вядуцца перагаворы з партнёрамі. - Ёсць і шэраг іншых кампанентаў. Напрыклад, працуем над праграмным забеспячэннем, каб нашы аўтамабілі мелі опцыі, спецыфічныя для нашага рынку: больш спрошчаная навігацыя, больш функцый".

Гаворачы аб пашырэнні вытворчасці, генеральны дырэктар СЗАТ "БЕЛДЖЫ" звярнуў увагу на доўгатэрміновыя і аператыўныя мэты. У ліку актуальных задач - мадэрнізацыя зборачнага канвеера, цэха зваркі, устаноўка новай аўтаматызаванай выпрабавальнай лініі, пашырэнне лагістычна-зборачных магчымасцей.

"Тут напрамак ідзе як на прымяненне больш сучаснага абсталявання з улікам патрабаванняў часу, так і на павелічэнне магутнасці па вытворчасці. Першапачаткова завод праектаваўся на магутнасць 60 тыс. машын, але ў праекце закладвалася магутнасць 120 тыс. У гэтым напрамку і рухаемся. Больш таго, зарэзервавана пляцоўка для арганізацыі штамповачнай вытворчасці. Цяпер вывучаем працэсы. Гэты этап - бліжэйшыя тры гады - будзе характарызавацца ўзмоцненай праграмай лакалізацыі і пастаяннай мадэрнізацыяй", - адзначыў Генадзь Свідзерскі.

версія для друку

зрабіць стартавай

дабавіць у выбранае