Бізнес-навіны

16 кастрычніка, Мінск /Кар. БЕЛТА/. ААТ "БелАЗ" - кіруючая кампанія холдынга "БелАЗ-Холдынг" нарошчвае ў продажах долю самазвалаў асабліва вялікай грузападымальнасці, паведамілі БЕЛТА на прадпрыемстве.

Паказчык сумарнай грузападымальнасці рэалізаваных з пачатку 2018 года самазвалаў вырас у параўнанні з аналагічным перыядам мінулага года ў 1,4 раза. Доля самазвалаў асабліва вялікай грузападымальнасці ў агульным аб'ёме адгрузкі тэхнікі дасягнула 65 працэнтаў, у той час як у 2012, пікавым, годзе - 36 працэнтаў.

Лідзіручае месца ў агульным аб'ёме адгрузкі за 9 месяцаў 2018 года займаюць 110-130-тонныя кар'ерныя самазвалы (38 працэнтаў), на другой пазіцыі 220-240 тоннікі (18 працэнтаў), затым ідуць 45-тонныя кар'ернікі (12 працэнтаў). Сумарная доля гэтых класаў грузападымальнасці ў аб'ёме адгрузкі за разглядаемы перыяд склала 68 працэнтаў. Прычым па выніках дзевяці месяцаў бягучага года аб'ём рэалізацыі 220-240-тонных кар'ерных самазвалаў дасягнуў узроўню ўсяго 2012 года (160 адзінак), што з'яўляецца рэкордным за ўсю гісторыю продажаў самазвалаў гэтага класа грузападымальнасці.

У студзені-верасні 2018 года прадпрыемства мела знешнегандлёвыя адносіны з партнёрамі з 45 краін. Першая пяцёрка знешнегандлёвых партнёраў Беларускага аўтамабільнага завода па ўдзельнай вазе ў знешнегандлёвым абароце (экспарт і імпарт) выглядае наступным чынам: Расія (57 працэнтаў), Узбекістан (10,9 працэнта), Вялікабрытанія (9,4 працэнта), Украіна (4,3 працэнта), Казахстан (3,4 працэнта).

Высокія рэзультаты ў экспарце дасягнуты за кошт росту паставак у Расію і краіны СНД. Долі гэтых рэгіёнаў у агульным аб'ёме адгрузкі склалі 59 працэнтаў і 27 працэнтаў адпаведна. Вялікая партыя тэхнікі адгружана на рынак СНД, у прыватнасці, ва Украіну, Казахстан. Толькі ва Узбекістан было пастаўлена 118 машын, што перавысіла рэкорднае значэнне ўсяго 2017 года.

Тэхніка БелАЗ пастаўлена ў краіны далёкага замежжа: Сербію, Інданезію, Балгарыю, Эстонію, Польшчу, Манголію, Боснію і Герцагавіну, Літву і Чэхію. Абсалютна новым для прадпрыемства стаў рынак Бангладэш, куды адгружана партыя бульдозераў, і Філіпіны - туды пастаўлена партыя самазвалаў грузападымальнасцю 55 т. З улікам адгрузкі запасных частак геаграфія паставак у далёкае замежжа налічвае 20 краін.