Бізнес-навіны
"Белавія" праводзіць падрыхтоўчую работу па адкрыцці рэйса з Мінска ў Адэсу
8 кастрычніка, Мінск /Таццяна Іванюк - БЕЛТА/. ААТ "Авіякампанія "Белавія" праводзіць падрыхтоўчую работу па адкрыцці рэйса з Мінска ў Адэсу. Аб гэтым карэспандэнту БЕЛТА паведаміла начальнік аддзела рэкламы і камунікацый прадпрыемства Вольга Герасенка.
"Цяпер праводзіцца падрыхтоўчая работа па адкрыцці рэйса Мінск - Адэса, вывучаецца дадаткова попыт на такі маршрут. Калі абставіны складуцца так, што авіязносіны паміж Расіяй і Украінай будуць спынены, то мы пачнём выконваць перавозкі па гэтым напрамку з 25 кастрычніка", - адзначыла спецыяліст. Пры гэтым яна звярнула ўвагу, што раней "Белавія" планавала адкрыць адпаведны рэйс летам 2016 года.
Як паведамлялася, нядаўна Украіна заявіла аб забароне палётаў у краіну расійскім авіякампаніям з пачатку зімовага раскладу. Таксама часткова або поўнасцю забаронены транзітныя пералёты расійскім авіяперавозчыкам праз тэрыторыю краіны. Аб увядзенні такіх жа мер з 25 кастрычніка адносна ўкраінскіх авіякампаній аб'явіла потым і Расія.
"Белавія" - буйны авіяперавозчык Беларусі, вядучы грузавы. У канцы студзеня 2014 года яна пачала работу ў юрыдычным статусе адкрытага акцыянернага таварыства. Авіякампанія, у флоце якой знаходзіцца 27 самалётаў, выконвае ўласныя рэгулярныя рэйсы ў 46 аэрапортаў 28 краін Еўропы, СНД і Азіі.
З 1997 года "Белавія" - правадзейны член Міжнароднай асацыяцыі паветранага транспарту (IATA), з 2010-га - член Асацыяцыі еўрапейскіх рэгіянальных авіякампаній (ERAA). Прырост пасажырскіх перавозак авіякампаніі па выніках васьмі месяцаў бягучага года склаў 5 працэнтаў у параўнанні з аналагічным перыядам мінулага года.
версія для друку
зрабіць стартавай
дабавіць у выбранае