Бізнес-навіны

"Беларуснафта" плануе нарошчваць здабычу вуглевадародаў у Расіі

Фота з архiва

10 верасня, Мінск /Кар. БЕЛТА/. РУП "ВА "Беларуснафта" плануе нарошчваць здабычу вуглевадародаў у Расіі. Аб гэтым у інтэрв'ю часопісу "Вестник "Белнефтехима" расказаў генеральны дырэктар прадпрыемства Аляксандр Ляхаў, паведамляе БЕЛТА.

Стратэгічна важным для "Беларуснафты" з'яўляецца праект па здабычы вуглевадародаў у Ямала-Ненецкай аўтаномнай акрузе Расіі. На Ізвесцінскім ліцэнзійным участку (у раёне Губкінскага) працуе даччынае прадпрыемства "Беларуснафты" - нафтавая кампанія "Янгпур". Запланаваная ёю здабыча вуглевадароднай сыравіны ў бягучым годзе чакаецца на ўзроўні 1,1 млн т у нафтавым эквіваленце, што складзе амаль 60 працэнтаў ад узроўню здабычы ў Беларусі. "У снежні 2019 года кампанія "Янгпур" набыла з аўкцыёну Паўднёва-Тыдэацінскі ліцэнзійны ўчастак (мяжуе з Ізвесцінскім ліцэнзійным участкам), тым самым папоўніўшы сыравінную базу здабычы вуглевадароднай сыравіны. Плануецца, што па вуглевадароднай сыравіне ў Расіі да 2026 года "Беларуснафта" выйдзе на такі ж узровень здабычы, як у Беларусі", - сказаў Аляксандр Ляхаў.

Паводле яго слоў, здабыча нафты ў Беларусі ў 2013-2016 гадах стабілізавалася на ўзроўні 1,645 млн т. А з 2017 года назіраецца яе пастаянны рост. "Чаканы аб'ём здабычы нафты ў Беларусі ў гэтым годзе - 1,71 млн т. Здабыча спадарожнага нафтавага газу складзе больш за 200 млн куб.м", - адзначыў гендырэктар.

"Працэс нафтаздабычы ў Беларусі ўступае ў новую гістарычную фазу: 1 чэрвеня ў Цэнтры інтэграваных аперацый нафтагазаздабыўнога ўпраўлення "Рэчыцанафты" стартаваў праект "Лічбавае радовішча". У перспектыве з дапамогай ІТ-тэхналогій плануецца ўвесці бесперапынны аналіз усіх працэсаў, каб максімальна аператыўна прымаць арганізацыйныя рашэнні. У якасці пілота выбрана буйнейшае Рэчыцкае радовішча", - праінфармаваў Аляксандр Ляхаў.

На канчатковым этапе стварэнне "Лічбавага радовішча" прадугледжвае аб'яднанне існуючых інфармацыйных сістэм, пабудову алгарытму ўзаемадзеяння і далейшае развіццё лічбавізацыі і інтэлектуалізацыі. Плануецца стварыць інтэлектуальную сістэму, якая будзе дапамагаць персаналу прымаць рашэнні. "У далейшым, пасля аснашчэння абсталяваннем і адпаведным праграмным забеспячэннем, Цэнтр інтэграваных аперацый стане той стартавай пляцоўкай, адкуль пачнецца лічбавізацыя айчыннай нафтаздабычы", - дадаў гендырэктар.

версія для друку

зрабіць стартавай

дабавіць у выбранае