Бізнес-навіны

Беларускія вытворцы выйшлі на кітайскія маркетплэйсы

Фота з архiва

6 ліпеня, Мінскі раён /Кар. БЕЛТА/. СЗАТ "Кампанія па развіцці індустрыяльнага парка" і кітайская кампанія UJU Holding Ltd будуць супрацоўнічаць з некаторымі беларускімі вытворцамі, перадае карэспандэнт БЕЛТА.

У час цырымоніі адкрыцця нацыянальнага павільёна Беларусі на кітайскіх платформах Jingdong і Douyin падпісаны мемарандумы аб супрацоўніцтве паміж СЗАТ "Кампанія па развіцці індустрыяльнага парка", UJU Holding Ltd і беларускімі вытворцамі - Мінскім малочным заводам нумар 1, шклозаводам "Нёман" і афіцыйным прадстаўніком "Беллакт" у КНР ТАА "Юнайтэд Лаві Інтэрнэшнл Трэйд". Падпісаныя дакументы забяспечаць эфектыўнае пашырэнне беларускай прадукцыі на кітайскіх маркетплэйсах.

Сёння ў "Вялікім камені" адбылася цырымонія адкрыцця нацыянальнага павільёна Беларусі на кітайскіх платформах Jingdong і Douyin. Мерапрыемства прымеркавана да 30-годдзя ўстанаўлення дыпламатычных адносін паміж Беларуссю і КНР. Аператарам Нацыянальнага павільёна выступае СЗАТ "Кампанія па развіцці індустрыяльнага парка".

JingDong - адзін з буйнейшых парталаў электроннай камерцыі ў КНР. У нацыянальным павільёне Беларусі, адкрытым на платформе, кітайскаму спажыўцу даступны тавары такіх вытворцаў, як "Камунарка", "Спартак", "Віцьба", "Белпрадукт". Пералік прадукцыі будзе пастаянна пашырацца.

Другая пляцоўка, на якой прадстаўлены павільён, - Douyin (кітайская версія TikTok). Акрамя камерцыйнага складніка кантэнт павільёна павінен знаёміць кітайскіх карыстальнікаў з традыцыямі краіны, яе культурай, прыродай і славутасцямі.

З моманту тэставага запуску агульная колькасць падпісчыкаў нацыянальнага павільёна Беларусі перасягнула 210 тыс. чалавек, а даход дасягнуў 1,1 млн юаняў, што эквівалентна $164 038 па курсе Нацбанка. У час першага стрыму на Douyin, праведзенага 5 ліпеня з удзелам Надзвычайнага і Паўнамоцнага Пасла Беларусі ў КНР, за 2,5 гадзіны колькасць падпісчыкаў нацыянальнага павільёна вырасла з 70 тыс. да 193 тыс., колькасць карыстальнікаў, якія глядзелі прамую трансляцыю адначасова, дасягнула 110 тыс. чалавек, а агульная колькасць праглядаў склала 1,32 млн.

версія для друку

зрабіць стартавай

дабавіць у выбранае