Бізнес-навіны

Беларускія піламатэрыялы на $2,6 млн прададзены ў Кітай праз БУТБ

Фота з архiва

5 сакавіка, Мінск /Кар. БЕЛТА/. Піламатэрыялы на агульную суму $2,6 млн прададзены ў КНР па выніках спецыяльнай гандлёвай сесіі, якая адбылася на Беларускай універсальнай таварнай біржы, паведаміў карэспандэнту БЕЛТА прэс-сакратар БУТБ Раман Яніў.

У грашовым выражэнні гэта самая вялікая партыя піламатэрыялаў, прададзеная на БУТБ з дастаўкай да пункта прызначэння на тэрыторыі Кітая. Яшчэ адной адметнай асаблівасцю праведзеных таргоў стаў высокі ўзровень канкурэнцыі паміж пакупнікамі, што дало магчымасць беларускім экспарцёрам за кошт росту цаны дадаткова зарабіць каля $220 тыс.

"Кожны месяц для ўдзелу ў таргах лесапрадукцыяй на біржавой пляцоўцы акрэдытуюцца 2-3 новыя кампаніі з Кітая. Гэта садзейнічае фарміраванню высокаканкурэнтнага асяроддзя і дае магчымасць беларускім дрэваапрацоўшчыкам рэалізоўваць піламатэрыялы на больш выгадных умовах. Таксама нельга не адзначыць рост цікавасці да біржавога механізма з боку прыватных лесапілак. Для іх біржа - гэта магчымасць з мінімальнымі затратамі выйсці на кітайскі рынак, чым яны актыўна карыстаюцца", - адзначыў Раман Яніў.

Спецыяльныя гандлёвыя сесіі па рэалізацыі піламатэрыялаў на экспарт з дастаўкай у кантэйнерах да пункта прызначэння ў краіне пакупніка праводзяцца на БУТБ са снежня 2020 года. У выніку аб'ёмы паставак айчыннай пілапрадукцыі ў Кітай значна павялічыліся і па выніках студзеня-лютага склалі ў грашовым выражэнні амаль $5 млн.

ААТ "Беларуская ўніверсальная таварная біржа" створана ў 2004 годзе. Першыя таргі прайшлі ў чэрвені 2005 года. БУТБ - адна з найбуйнейшых таварных бірж ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае