Бізнес-навіны
Беларуска-еўрапейскі інвестфорум плануецца правесці ў Аўстрыі пры падтрымцы Еўракамісіі
4 лютага, Мінск /Аліна Грышкевіч - БЕЛТА/. Беларуска-еўрапейскі інвестыцыйны форум плануецца правесці ў Аўстрыі пры падтрымцы Еўракамісіі. Аб гэтым паведаміў сёння на брыфінгу начальнік упраўлення інфармацыі - прэс-сакратар МЗС Беларусі Дзмітрый Мірончык, перадае карэспандэнт БЕЛТА.
Гэта пытанне будзе разглядацца ў час кансультацый у МЗС Беларусі з дэлегацыяй Еўрапейскай камісіі на чале са спецыяльным саветнікам па асаблівых даручэннях генеральнага дырэктарата па гандлі Петэрам Балашам. Візіт праходзіць 3-5 лютага.
На кансультацыях плануецца дэталёва абмеркаваць напаўненне і развіццё тавараабароту паміж Беларуссю і Еўрасаюзам, пытанні ўзаемнага доступу на рынкі, стан перагавораў аб далучэнні Беларусі да СГА і далейшыя сумесныя дзеянні ў гэтым напрамку. Акрамя таго, у цэнтры ўвагі будзе тэма ўзаемадзеяння паміж ЕАЭС і ЕС.
Ужо адбылася сустрэча дэлегацыі Еўракамісіі з першым намеснікам міністра замежных спраў Аляксандрам Міхневічам. Праграмай візіту прадугледжаны таксама сустрэчы з кіраўніцтвам Мінэканомікі, Мінсельгасхарча і Міністэрства прамысловасці Беларусі.
версія для друку
зрабіць стартавай
дабавіць у выбранае