Бізнес-навіны
Беларусь запрасілі прыняць удзел у стварэнні новай сталіцы Інданезіі
Фота з архiва
26 мая, Масква /Эдуард Півавар - БЕЛТА/. Беларусь запрасілі прыняць удзел у рэалізацыі праекта па стварэнні новай адміністрацыйнай сталіцы Інданезіі. Аб гэтым паведаміў дырэктар Нацыянальнага цэнтра маркетынгу і кан'юнктуры цэн Міністэрства замежных спраў Беларусі Мікалай Барысевіч, каменціруючы карэспандэнту БЕЛТА вынікі праведзенага 26 мая ў Маскве ў Дзелавым і культурным комплексе пасольства Беларусі ў Расіі беларуска-інданезійскага бізнес-форуму.
"Адной з тэм абмеркавання стала рэалізацыя праекта па будаўніцтве новай адміністрацыйнай сталіцы Інданезіі. Інданезійскі бок разлічвае, што Беларусь падключыцца да гэтага праекта", - сказаў Мікалай Барысевіч.
"Інданезія была і застанецца для нас ключавым рынкам і гандлёвым партнёрам у гэтым рэгіёне, - падкрэсліў ён. - Гэта чацвёртая па насельніцтве краіна свету, адпаведна, патрэбнасць для такой колькасці людзей у прадукцыі і таварах вельмі вялікая. Зразумела, што гэта вуліца з двухбаковым рухам, і мы таксама зацікаўлены ў пэўных таварах з Інданезіі. Акрамя таго, мы разглядаем Інданезію як хаб для выхаду на іншыя азіяцкія рынкі. Таму работы шмат".
Мікалай Барысевіч растлумачыў, што асноўная мэта мерапрыемства была прыкладная і практычная - пашыраць беларускі экспарт. "Таму мы сёння прадставілі беларускія магчымасці ў найбольш перспектыўных з нашага пункту гледжання галінах, якія могуць быць цікавымі інданезійскім партнёрам. У нас, у прынцыпе, збалансаваны і ўстойлівы гандаль, налічваецца каля некалькіх соцень таварна-экспартных пазіцый. Асноўны экспартны патэнцыял цяпер у нас у сферы забеспячэння харчовай бяспекі - гэта перш за ўсё калійныя ўгнаенні. Апошнім часам у Інданезіі ёсць вялікі інтарэс да павелічэння паставак беларускай малочнай прадукцыі, яна вельмі запатрабавана, і інданезійскія партнёры на форуме гэта адзначалі, таму будзем шукаць яшчэ новыя шляхі, як задаволіць гэтыя патрэбнасці", - сказаў ён.
Перспектыўным Мікалай Барысевіч лічыць таксама напрамак па пастаўках халяльнай прадукцыі: "Мы падпісалі ў мінулым годзе спецыяльнае пагадненне, і цяпер завяршаецца працэс па акрэдытацыі і атрыманні адпаведных сертыфікатаў. Спадзяёмся, што з гэтага пункту гледжання з'явяцца новыя дадатковыя магчымасці: аб гэтым таксама сёння гаварылася на форуме, і была праведзена наша прэзентацыя".
"Наступны напрамак (і ў ім таксама зацікаўлены інданезійскія партнёры, і гэта адзначалася намеснікам міністра сельскай гаспадаркі Інданезіі) - пастаўкі прадукцыі сельскагаспадарчага машынабудавання, а таксама БЕЛАЗаў, якія паспяхова працуюць ужо на Суматры і ў іншых рэгіёнах. Прычым, што датычыцца беларускай сельгастэхнікі, інданезійцы зацікаўлены не толькі ў павелічэнні яе паставак, але і ў стварэнні ў сябе сумесных з Беларуссю вытворчасцей", - дадаў дырэктар Нацыянальнага цэнтра маркетынгу і кан'юнктуры цэн.
"Гэта значыць, гэта ключавыя, апорныя кропкі, на якіх мы цяпер будзем канцэнтравацца, для таго каб пашыраць нашу прадукцыю. Мы канкурэнтаздольныя на гэтым рынку, ёсць зацікаўленасць з боку інданезійскіх партнёраў. І калі ёсць патрэбнасць, значыць, мы будзем шукаць сваю нішу і задавольваць гэту патрэбнасць", - рэзюмаваў ён.
У мерапрыемстве ўдзельнічалі прадстаўнікі інданезійскіх органаў кіравання і рэгіёнаў, кіраўнікі экспартна-імпартных кампаній Інданезіі ў сферы АПК, прадстаўнікі беларускага і інданезійскага бізнесу, зацікаўленыя ў развіцці і ўстанаўленні новых узаемавыгадных сувязей. Асобна Мікалай Барысевіч вылучыў удзел у форуме пасла Інданезіі ў Расіі і ў Беларусі па сумяшчальніцтве Жазэ Антоніа Марата Таварэша. "Пасол Інданезіі бачыць вялікія перспектывы ў супрацоўніцтве нашых краін. У тым ліку і дзякуючы яго асабістым намаганням у нас у гандлёва-эканамічнай сферы прыкметны значны прагрэс. Ён зацікаўлены, праяўляе добрае чалавечае і прафесійнае стаўленне да нас, і гэту зацікаўленасць мы павінны, вядома, выкарыстоўваць", - сказаў дырэктар Нацыянальнага цэнтра маркетынгу і кан'юнктуры цэн.
версія для друку
зрабіць стартавай
дабавіць у выбранае