Бізнес-навіны

Беларусь уваходзіць у топ-5 партнёраў Башкортастана

11 кастрычніка, Мінск /Кар. БЕЛТА/. Беларусь уваходзіць у топ-5 краін, з якімі супрацоўнічае Башкортастан. Аб гэтым журналістам паведаміла міністр знешнеэканамічных сувязей і кангрэснай дзейнасці Башкортастана Маргарыта Болычава.

"Адным з ключавых знешнеэканамічных партнёраў Башкортастана, вядома ж, з'яўляецца Беларусь. На гэты момант топ-5 краін-контрагентаў, у які ўваходзіць Беларусь, з'яўляюцца для нас прыярытэтнымі краінамі, з якімі мы вядзём супрацоўніцтва. Важна адзначыць, што тавараабарот у нас з Беларуссю расце, і на бягучы перыяд ён практычна на 10 працэнтаў большы, чым у папярэднім годзе. Тут размова ідзе пра экспарт і імпарт. Адзін з важных крытэрыяў росту тавараабароту - гэта, вядома, колькасць візітаў, якія робяцца як у Башкортастан, так і ў Беларусь бізнес-місіямі, нашымі партнёрамі. Адбыўся чарговы візіт пад кіраўніцтвам прэм'ер-міністра Беларусі Рамана Галоўчанкі, ён прымеркаваны да адкрыцця завода "Амкадор". Таксама запушчана новае будаўніцтва новага завода на тэрыторыі індустрыяльнага парка "Уфімскі", - расказала Маргарыта Болычава.

Яна адзначыла, што сёння Беларусь і Башкортастан абменьваюцца таварамі практычна ўсяго спектра народнага і прамысловага спажывання. "Гэта прадукты, прадукцыя лёгкай прамысловасці, таксама прамысловая кааперацыя ў нас развіта вельмі актыўна. У мінулым годзе адбылося адкрыццё новых дылерскіх цэнтраў, якія працуюць на тэрыторыі Башкортастана і рэалізуюць аўтамабільную прадукцыю Беларусі. Аналагічна і нашы тавары запатрабаваныя, добра прадаюцца і цікавыя беларускаму спажыўцу. Што датычыцца візітаў, у сярэднім на сённяшні момант іх каля 30 - да нас і ад нас. Наведваем не толькі Мінск, але і Віцебск, і Гомель, і іншыя рэгіёны, якія для нас вельмі важныя, некаторыя з'яўляюцца пабрацімамі, у нас падпісаны адпаведныя пагадненні, у тым ліку ў час Форуму рэгіёнаў Расіі і Беларусі. Таму мы адкрыты для нашых партнёраў", - канстатавала міністр.

Паводле слоў Маргарыты Болычавай, санкцыі - гэта выключныя магчымасці. "Гэта тыя магчымасці, якія былі прыкрыты нейкімі відавочнымі інтарэсамі іншых краін, а сёння мы па-новаму адкрываем для сябе Беларусь, знаходзім абсалютна ўнікальныя тавары, яны якасныя, прыгожыя, смачныя, маюць увесь спектр, неабходны для спажыўца. Таксама мы з задавальненнем дзелімся тым, што вынаходзім, развіваем у сябе ў Башкортастане. Мы бачым відавочную зваротную сувязь і зацікаўленасць у нашых таварах у спажыўцоў Беларусі", - падкрэсліла міністр.

версія для друку

зрабіць стартавай

дабавіць у выбранае