Бізнес-навіны

Беларусь разлічвае амаль у два разы нарасціць аб'ёмы паставак прадуктаў харчавання ў Кітай

Фота з архiва

1 сакавіка, Пекін /Кар. БЕЛТА/. Беларусь разлічвае ў 2023 годзе амаль у два разы нарасціць аб'ёмы паставак прадуктаў харчавання ў Кітай. Аб гэтым у Пекіне расказаў журналістам міністр сельскай гаспадаркі і харчавання Ігар Брыло, перадае карэспандэнт БЕЛТА.

Па выніках 2022 года Беларусь паставіла ў Кітай прадуктаў харчавання на суму звыш $500 млн. "Гэта рост больш як на 40 працэнтаў. Але гэта ўсё роўна не тыя лічбы. Кітай - вялікая краіна. І хоць мы шэсць апошніх гадоў істотна дабаўляем, але гэта ўсё роўна не тыя лічбы. На гэты год мы паставілі амбіцыйную задачу падысці да $900 млн. Думаю, мы з ёй справімся", - заявіў кіраўнік Мінсельгасхарча.

Ігар Брыло расказаў, што ў Кітаі ў гэтыя дні ў яго адбыліся плённыя сустрэчы па розных напрамках, у тым ліку з калегамі ў профільным ведамстве. "Амаль дзве гадзіны ў нас прадаўжалася сустрэча. Мы абгаварылі ўсе нашы бягучыя пытанні, у прыватнасці, па далейшым узаемадзеянні ў розных галінах сельскай гаспадаркі", - сказаў ён.

У пераліку дакументаў да падпісання ў ходзе дзяржаўнага візіту Прэзідэнта ёсць і мемарандум, які датычыцца развіцця супрацоўніцтва па лініі Мінсельгасхарча.

Адбылася таксама сустрэча ў Галоўным мытным упраўленні КНР, што звязана з планамі павялічыць асартымент прадаваемай на кітайскім рынку беларускай прадукцыі. "На сёння мы прадаём ялавічыну, малако сухое і неразведзенае, мяса птушкі. Я прывёз дакументы на адкрыццё прадпрыемстваў (для паставак. - Заўвага БЕЛТА) па прадукцыі, якая прайшла тэрмічную апрацоўку. Гэта датычыцца мяса птушкі і ялавічыны. Мы прывезлі дакументы на адкрыццё па нашай кансерваванай прадукцыі. І для нас вельмі важная дзіцячая, гамагенізаваная прадукцыя. Гэта другі блок пытанняў", - расказаў Ігар Брыло.

Трэці - гэта наш стратэгічны напрамак - развіццё Беларускай нацыянальнай біятэхналагічнай карпарацыі і будаўніцтва "БНБК-3". Ён прадугледжвае арганізацыю вытворчасці вітамінаў, амінакіслот, прадуктаў крухмальнай, глюкознай вытворчасці. Гэта дасць магчымасць наладзіць выпуск прынцыпова новых як для Беларусі, так і для ўсіх краін СНД прадуктаў - вітамінаў (В2, В12, С) і новых відаў амінакіслот (валін, лейцын, ізалейцын).

"У Кітаі з'явілася некалькі гадоў таму дзяржаўнае агенцтва па інвестыцыях, якое ўзяло на сябе ролю мадэратара ўсіх такіх інвестыцыйных праектаў. Мне ўдалося сустрэцца з кіраўніцтвам гэтага агенцтва. Больш за дзве гадзіны праводзілі перагаворы, - адзначыў Ігар Брыло. - Іх хвалявала пытанне, куды будзе рэалізавана наша прадукцыя. У прыватнасці, вітаміны. Мы дэталёвым чынам расклалі па палічках кожную краіну, куды Беларусь будзе прадаваць. Дамовіліся, што літаральна сёння мы ім даём паўнацэнную інфармацыю з расшыфроўкай кожнага кілаграма, кожнай краіны. Вельмі вялікі пазітыўны настрой у мяне на тое, што "БНБК-3" у нашай краіне будзе будавацца. Гэта вялікія інвестыцыі".

Акрамя таго, з кітайскімі партнёрамі падпісаны два дакументы адносна развіцця вытворчасцей у сферы АПК на тэрыторыі Беларусі. "У прыватнасці, для Мінскай і Магілёўскай абласцей. Будзе будавацца найбуйнейшы ў Беларусі свінагадоўчы комплекс на 300 тыс. галоў - у Мінскай вобласці. Гэта добры, вельмі важны для нашай краіны праект. І будзем мадыфікаваць нашу мясную жывёлагадоўлю на базе Магілёўскай вобласці. Перш за ўсё - будаўніцтва асобнага забойнага цэха. Будзе будавацца каля тысячы легкаважных навесаў для ўтрымання буйной рагатай жывёлы парод абердзін-ангускай або лімузін. Пакуль прыярытэт кітайцаў стаіць на абердзін-ангускай. Даволі ёмістая размова і добрыя намеры былі падпісаны. Гэта ўжо такая дарожная карта супрацоўніцтва канкрэтна Міністэрства сельскай гаспадаркі са сваімі калегамі з Кітая", - сказаў Ігар Брыло.

Прадукцыя адпаведных прадпрыемстваў спачатку будзе пастаўляцца на ўнутраны рынак, але ён і так даволі насычаны. Таму ёсць добры патэнцыял для экспартных паставак у тым ліку ў Кітай. "У нас цяпер у Беларусі каля 2,8 млн галоў свіней. Мы забяспечваем паўнацэннае харчаванне сваіх людзей. Ніякай вялікай ролі экспарт у КНР з гэтага буйнога свінакомплексу для нашых спажыўцоў не адыграе. Гэта, наадварот, будзе добрая валютная выручка", - адзначыў міністр.

Што датычыцца гадоўлі буйной рагатай жывёлы, то ў гэтым плане важна, што ў Беларусі прыйдзе новая парода, якая будзе канкурыраваць з існуючымі тэхналогіямі. "Гэта вельмі нядрэнны крок. Таму я звязваю з гэтым праектам толькі станоўчыя эмоцыі", - сказаў Ігар Брыло.

версія для друку

зрабіць стартавай

дабавіць у выбранае