Бізнес-навіны

Беларусь на міжнароднай выстаўцы ў Казахстане абмяркоўвала шляхі нарошчвання паставак прадукцыі

Фота з архiва

23 кастрычніка, Мінск /Кар. БЕЛТА/. Надзвычайны і Паўнамоцны Пасол Рэспублікі Беларусь у Рэспубліцы Казахстан Павел Уцюпін прыняў удзел у Міністэрскай канферэнцыі краін СНД па харчовай бяспецы. Аб гэтым карэспандэнту БЕЛТА расказалі ў пасольстве нашай краіны ў Казахстане.

У канферэнцыі прынялі ўдзел прадстаўнікі Выканаўчага камітэта СНД, Беларусі, Азербайджана, Кыргызстана, Расіі, Таджыкістана, Туркменістана, Узбекістана, а таксама Бюро па сувязях і партнёрстве Харчовай і сельскагаспадарчай арганізацыі ААН (ФАО) у Казахстане. Ад беларускага боку з дакладам выступіў намеснік міністра сельскай гаспадаркі і харчавання Рэспублікі Беларусь Вадзім Шагойка. Па выніках Міністэрскай канферэнцыі дзяржаў - удзельніц СНД па пытаннях супрацоўніцтва ў галіне забеспячэння харчовай бяспекі міністры сельскай гаспадаркі, кіраўнікі дэлегацый прынялі камюніке.

Павел Уцюпін таксама азнаёміўся з прадукцыяй беларускіх арганізацый, якія прымаюць удзел у выстаўцы - ТАА "Аграпаліхім", ТАА "РТІфлекс", ВТАА "Тэхмаш", Мінскі маторны завод, РСУП "Гомельдзяржплемпрадпрыемства". Ён таксама правёў перагаворы з іх прадстаўнікамі па пытаннях нарошчвання паставак і пошуку новых варыянтаў супрацоўніцтва з Рэспублікай Казахстан.

Міністэрская канферэнцыя дзяржаў - удзельніц СНД па пытаннях супрацоўніцтва ў галіне забеспячэння харчовай бяспекі адбылася ў рамках Міжнароднай сельскагаспадарчай выстаўкі KazAgro/KazFarm-2023.

версія для друку

зрабіць стартавай

дабавіць у выбранае