Бізнес-навіны

Беларусь мае намер актывізаваць супрацоўніцтва з Уладзімірскай вобласцю ў сельскай гаспадарцы

Фота Міністэрства эканомікі

16 мая, Мінск /Кар. БЕЛТА/. У Беларусі і Уладзімірскай вобласці вялікі патэнцыял для нарошчвання гандлёва-эканамічнага супрацоўніцтва. Аб гэтым заявіў міністр эканомікі Аляксандр Чарвякоў у ходзе пасяджэння рабочай групы па супрацоўніцтве Беларусі з Уладзімірскай вобласцю Расіі, паведамілі БЕЛТА ў прэс-службе Міністэрства эканомікі.

Як адзначыў Аляксандр Чарвякоў, узаемны тавараабарот Беларусі і Уладзімірскай вобласці за 2022-і дасягнуў шасцігадовага максімуму. "У сферы прамысловасці нашы прадпрыемствы зацікаўлены ў павелічэнні паставак металапрадукцыі, трансфарматараў, камплектуючых. Сваю тэхніку гатовы пастаўляць МАЗ і БЕЛАЗ, забяспечваючы яе якаснае і своечасовае сэрвіснае абслугоўванне. Абмяркоўваецца магчымасць стварэння ў рэгіёне зборачнай вытворчасці трактароў малой магутнасці і камунальнай тэхнікі. Мы зацікаўлены ўдзельнічаць у праектах абнаўлення парку пасажырскай тэхнікі рэгіёна. Прапануем таксама актывізаваць узаемадзеянне ў галіне сельскай гаспадаркі. Перспектыўным напрамкам тут бачыцца пашырэнне наменклатуры і нарошчванне экспарту прадуктаў харчавання і сельскагаспадарчай сыравіны", - сказаў міністр.

Паводле яго слоў, вопыт і кампетэнцыі беларускіх будаўнікоў могуць быць запатрабаваны пры будаўніцтве і капрамонце школ, сацыяльных аб'ектаў, дарог ва Уладзімірскай вобласці. "Асаблівую значнасць у бягучых умовах маюць сумесныя імпартазамяшчальныя праекты ў галіне вытворчасці сродкаў дыягностыкі захворванняў і лекавых прэпаратаў для насельніцтва нашых краін. На мой погляд, неабходна пашырыць двухбаковае супрацоўніцтва ў сферы медыцыны і аховы здароўя. Усе гэтыя прапановы падмацаваны існуючымі ў нас магчымасцямі", - падкрэсліў Аляксандр Чарвякоў.

Удзельнікі мерапрыемства адзначылі паспяховае выкананне дамоўленасцей, дасягнутых у ходзе мінулагодняга пасяджэння рабочай групы. Таксама намечаны канкрэтныя крокі па рэалізацыі пагаднення аб супрацоўніцтве Беларусі і Уладзімірскай вобласці ў 2023 годзе.

Пасля завяршэння пасяджэння было падпісана 11 пагадненняў, рэалізацыя якіх будзе садзейнічаць умацаванню супрацоўніцтва ў розных сферах эканамічнай і гуманітарнай дзейнасці (інвестыцый, падтрымкі прадпрымальніцтва, экспарту, раслінаводства, турызму, культуры і інш.).

версія для друку

зрабіць стартавай

дабавіць у выбранае