Бізнес-навіны

3 кастрычніка, Кішынёў /Юлія Огнева - БЕЛТА/. Беларусь гатова падзяліцца з Малдовай вопытам у будаўніцтве дарог і інфраструктуры, заявіў сёння журналістам прэм'ер-міністр Беларусі Андрэй Кабякоў, падводзячы вынікі афіцыйнага візіту ў Малдову, перадае карэспандэнт БЕЛТА.

"Гаворачы аб перспектывах прысутнасці малдаўскіх калег на беларускім рынку, мы ў першую чаргу зацікаўлены ў арганізацыі сумеснай перапрацоўкі ў Беларусі малдаўскай плодаагародніннай прадукцыі для яе паставак на рынак Еўразійскага эканамічнага саюза. Для нашых калег таксама можа быць цікавы шырокі вопыт Беларусі ў галіне будаўніцтва дарог і інфраструктуры, узвядзення малочнатаварных ферм і іншых сельскагаспадарчых аб'ектаў", - адзначыў Андрэй Кабякоў.

Ён канстатаваў, што ў час візіту праведзена два знакавыя мерапрыемствы, на якіх разгледзелі стан і перспектывы двухбаковага гандлёва-эканамічнага супрацоўніцтва: беларуска-малдаўскі эканамічны форум і пасяджэнне Міжурадавай беларуска-малдаўскай камісіі па гандлёва-эканамічным супрацоўніцтве. "На работу гэтай камісіі мы ўскладаем асаблівыя надзеі. Лічу, што камісія павінна стаць дзейсным інструментам аператыўнага ўстаранення праблемных пытанняў узаемадзеяння і выпрацоўкі перспектыўных напрамкаў двухбаковага супрацоўніцтва", - падкрэсліў прэм'ер-міністр.

Паводле яго слоў, у Беларусі і Малдовы ёсць сур'ёзны патэнцыял у міжрэгіянальным супрацоўніцтве, урады краін гатовы ўсебакова садзейнічаць развіццю пабрацімскіх сувязей.