Бізнес-навіны
Беларусь і Славакія разглядаюць магчымасць супрацоўніцтва ў галіне падрыхтоўкі кадраў у атамнай энергетыцы
2 кастрычніка, Мінск /Аліна Грышкевіч - БЕЛТА/. Беларусь і Славакія разглядаюць магчымасць супрацоўніцтва ў галіне падрыхтоўкі кадраў у атамнай энергетыцы. Аб гэтым заявіў сёння намеснік міністра замежных спраў Беларусі Аляксандр Гур'янаў па выніках 12-га пасяджэння беларуска-славацкай сумеснай камісіі па гандлёва-эканамічным і навукова-тэхнічным супрацоўніцтве, перадае карэспандэнт БЕЛТА.
Аляксандр Гур'янаў, які ўзначальваў беларускую частку камісіі на перагаворах, падзякаваў дзяржаўнаму сакратару Міністэрства эканомікі Расціславу Хованцу за канструктыўную работу. Ён адзначыў, што славацкая дэлегацыя прыбыла ў Мінск у прадстаўнічым складзе. Акрамя пленарнага пасяджэння камісіі адбыліся двухбаковыя перагаворы, беларуска-славацкі эканамічны форум, у час якіх было намечана нямала новых праектаў у сферах, якія ўяўляюць узаемны інтарэс.
На думку намесніка міністра, паміж Беларуссю і Славакіяй цяпер ідзе плённы дыялог, прычым не толькі ў гандлёва-эканамічнай, але і палітычнай сферы. Ён падзякаваў славацкаму боку за падтрымку па павышэнні крэдытнага рэйтынгу Беларусі.
Аляксандр Гур'янаў таксама выказаў меркаванне, што двухбаковае супрацоўніцтва трэба выкарыстоўваць і ў інтэграцыйных аб'яднаннях - ЕАЭС і ЕС. Намеснік міністра сказаў, што вызначаны шэраг напрамкаў, дзе Беларусь і Славакія будуць супрацоўнічаць, узаемадзейнічаючы ў гэтых двух саюзах.
Акрамя таго, Аляксандр Гур'янаў назваў важнымі супрацоўніцтва па мадэрнізацыі нафтахімічнай галіны, развіццё кантактаў у прамысловасці і энергетыцы.
версія для друку
зрабіць стартавай
дабавіць у выбранае