Бізнес-навіны

Беларусь і Расія працуюць над стварэннем групоўкі малых касмічных апаратаў

Фота з архiва

10 красавіка, Мінск /Кар. БЕЛТА/. Дырэктар УП "Геаінфармацыйныя сістэмы" НАН Беларусі Сяргей Залатой на прэс-канферэнцыі, прымеркаванай да Сусветнага дня авіяцыі і касманаўтыкі, расказаў аб развіцці малых касмічных апаратаў і стварэнні груповак, якія складаюцца з іх, перадае карэспандэнт БЕЛТА.

"Гэта лёгкія і недарагія апараты. У выніку таго, што функцыянальныя магчымасці такіх апаратаў абмежаваны, прынцыпы дыстанцыйнага зандзіравання крыху іншыя (у адрозненне ад цяжкіх касмічных апаратаў. - Заўвага БЕЛТА). З малых апаратаў ствараецца групоўка, яны спецыялізуюцца на асобных функцыях, а разам гэты "рой" касмічных апаратаў вырашае падобныя з цяжкім касмічным апаратам задачы", - расказаў Сяргей Залатой.

Паводле слоў прадстаўніка НАН, Беларусь сумесна з Расіяй выконвае саюзную праграму "Комплекс-СД", у рамках якой ствараецца групоўка малых касмічных апаратаў. "Два апараты робіць Расія, адзін робіць Беларусь. Гэта касмічныя апараты вагой 10 кг. Ёсць апарат больш сур'ёзны, які важыць каля 50 кг. Гэта групоўка будзе вырашаць задачы, звязаныя ў тым ліку з дыстанцыйным зандзіраваннем Зямлі", - падкрэсліў ён.

Як адзначыў Сяргей Залатой, устаноўленая на апараце вагой каля 50 кг камера будзе забяспечваць распазнаванне каля 2 м. Гэта камера фактычна аналагічная той, якая ўстаноўлена на дзеючым беларускім касмічным апараце. "Але калі дзеючы апарат важыць каля 500 кг, то новы будзе важыць 50 кг. Гэта значыць мы бачым істотныя змяненні як у вагавых характарыстыках, так і ў кошце гэтых апаратаў", - рэзюмаваў прадстаўнік НАН.

версія для друку

зрабіць стартавай

дабавіць у выбранае