Бізнес-навіны

Беларусі і Расіі неабходна развіваць супрацоўніцтва ў сферы ІТ - Лук'янаў

Фота з архiва

27 ліпеня, Гомель /Кар. БЕЛТА/. Беларусі і Расіі неабходна развіваць супрацоўніцтва ў сферы ІТ і аб'ядноўваць намаганні. На гэтым акцэнтаваў увагу Надзвычайны і Паўнамоцны Пасол Расійскай Федэрацыі ў Рэспубліцы Беларусь Яўген Лук'янаў, адказваючы на пытанні журналістаў пасля сустрэчы са старшынёй Гомельскага аблвыканкама Генадзем Салаўём, перадае карэспандэнт БЕЛТА.

Бакі адзначылі трывалыя сувязі і кантакты паміж Расіяй і Беларуссю. "Гэта кантакты як на ўзроўні асобных прадпрыемстваў, так і паміж рэгіёнамі. На мой погляд, самая эфектыўная работа будуецца на адной гарызанталі, калі партнёры супрацоўнічаюць у адной галіне, у адной плоскасці. У іх ёсць агульныя інтарэсы і праблемы. І калі яны сумесна шукаюць рашэнне гэтых праблем, у іх атрымліваецца лепш", - адзначыў Яўген Лук'янаў.

Надзвычайны і Паўнамоцны Пасол Расійскай Федэрацыі ў Рэспубліцы Беларусь назваў тры асноўныя вектары, па якіх ідзе цеснае ўзаемадзеянне расійскіх і беларускіх партнёраў. Плённае супрацоўніцтва наладжана ў сферы машынабудавання, малочнай вытворчасці і сельскагаспадарчай галіны. "Найбольш перспектыўны напрамак у сучасным свеце - супрацоўніцтва ў сферы высокіх тэхналогій. Гэта тое, што неабходна развіваць і ў Расіі, і ў Беларусі. І аб'ядноўваць гэтыя намаганні", - акцэнтаваў увагу ён.

На думку пасла, паняцце "прыгранічнае супрацоўніцтва" неабходна разглядаць скрозь прызму палітычнай карты. "Ёсць дзяржава Беларусь і ёсць дзяржава Расія - і ўсе кантакты любога суб'екта гэтых дзяржаў прыгранічныя. У гэтым і заключаецца патэнцыял на рэальны поспех у супрацоўніцтве. Паколькі мэты любой дзяржавы вельмі простыя - сацыяльна-эканамічны дабрабыт сваіх грамадзян", - падкрэсліў ён.

Старшыня Гомельскага аблвыканкама Генадзь Салавей на сустрэчы з Яўгенам Лук'янавым расказаў аб прамысловым, культурным, гістарычным і адукацыйным патэнцыяле паўднёва-ўсходняга рэгіёна краіны.

Яўген Лук'янаў плануе наведаць шэраг прамысловых прадпрыемстваў рэгіёна, уключаючы ААТ "Гомсельмаш", ААТ "Мазырскі нафтаперапрацоўчы завод", ТАА "Міртэк-інжынірынг" і інш.

Тавараабарот паміж Гомельскай вобласцю і Расійскай Федэрацыяй па выніках студзеня - мая 2021 года склаў $2467,8 млн (тэмп - 217,7 працэнта), экспарт - $675,6 млн (125,0 працэнта), імпарт - $1792,2 млн (302,4 працэнта).

Удзельная вага знешняга гандлю з Расіяй у паказчыках Гомельскай вобласці склала: у тавараабароце - 54,9 працэнта, экспарце - 31,4 працэнта, імпарце - 76,5 працэнта. Першыя пазіцыі па аб'ёме экспартных паставак тавараў займаюць Маскоўская вобласць (24,5 працэнта), Масква (13,5 працэнта), Санкт-Пецярбург (8,1 працэнта), Бранская (7,7 працэнта) і Смаленская (4,4 працэнта) вобласці. Найбольш запатрабаваны ў Расіі беларускія пруткі і дрот з жалеза або нелегіраванай сталі, малочная прадукцыя, сельскагаспадарчая тэхніка і запасныя часткі да яе, сінтэтычныя валокны, нятканыя матэрыялы, метызы і інш.

За студзень - сакавік 2021 года аб'ём замежных інвестыцый, якія паступілі з Расійскай Федэрацыі, склаў $154,3 млн. Удзельная вага ў агульным аб'ёме інвестыцый, якія паступілі ад замежных інвестараў, - 46 працэнтаў. За 2020 год аб'ём укладанняў ад расійскіх інвестараў склаў $515,2 млн.

У Гомельскай вобласці зарэгістравана 361 прадпрыемства з расійскім капіталам, у тым ліку сярод рэзідэнтаў СЭЗ "Гомель-Ратон" 12 кампаній з удзелам расійскага капіталу.

Гомельскім аблвыканкамам заключана 22 двухбаковыя дакументы аб міжрэгіянальным супрацоўніцтве з расійскімі рэгіёнамі. Саветам дэпутатаў падпісана 9 двухбаковых дакументаў аб міжрэгіянальным супрацоўніцтве з расійскімі рэгіёнамі. Гэта Амурская, Бранская, Кіраўская, Курская, Мурманская, Ніжагародская, Арэнбургская, Самарская, Свярдлоўская вобласці. Паміж адміністрацыйна-тэрытарыяльнымі адзінкамі Гомельскай вобласці і Расіі падпісана 78 двухбаковых дакументаў аб супрацоўніцтве.

версія для друку

зрабіць стартавай

дабавіць у выбранае