Бізнес-навіны

23 сакавіка, Мінск /Аліна Грышкевіч - БЕЛТА/. Беларусі і Пакістану пад сілу нарасціць узаемны тавараабарот да $1 млрд да 2020 года. Аб гэтым сказаў міністр прамысловасці Беларусі Віталь Воўк 23 сакавіка на мерапрыемстве з нагоды нацыянальнага свята - Дня Пакістана, перадае карэспандэнт БЕЛТА.

"Адносіны паміж Беларуссю і Пакістанам з кожным годам толькі ўмацоўваюцца, а двухбаковае супрацоўніцтва плённа развіваецца ва ўсіх сферах, - расказаў міністр прамысловасці. - Два апошнія гады сталі пераломнымі ў беларуска-пакістанскіх адносінах і азнаменаваліся пачаткам сур'ёзнага палітычнага дыялогу на вышэйшым і высокім узроўнях. У маі 2015 года быў зроблены першы ў гісторыі афіцыйны візіт Прэзідэнта Беларусі Аляксандра Лукашэнкі ў Пакістан. У жніўні 2015 года прэм'ер-міністр Пакістана Наваз Шарыф наведаў Беларусь. У лістападзе гэтага ж года быў арганізаваны афіцыйны візіт прэм'ер-міністра Беларусі Андрэя Кабякова ў Пакістан. А ў кастрычніку 2016-га быў зроблены другі афіцыйны візіт кіраўніка беларускай дзяржавы ў гэту краіну".

У палітычнай сферы ўзаемная воля да развіцця дыялогу зафіксавана ў Ісламабадскай дэкларацыі беларуска-пакістанскага партнёрства і дагаворы аб дружбе і супрацоўніцтве паміж Беларуссю і Пакістанам, адзначыў Віталь Воўк. На яго думку, важнейшым дакументам у сферы гандлёва-эканамічных адносін стала дарожная карта беларуска-пакістанскага супрацоўніцтва на каротка- і сярэднетэрміновую перспектывы. Кіраўніцтвам Беларусі і Пакістана пастаўлена задача павялічыць да 2020 года аб'ём узаемнага тавараабароту да $1 млрд. "Створана неабходная дагаворна-прававая база для развіцця беларуска-пакістанскага супрацоўніцтва ў навуцы і тэхналогіях, міжрэгіянальным узаемадзеянні, а таксама кантактаў у культурнай сферы, - сказаў міністр прамысловасці. - Усё гэта сведчыць аб вялікіх і рэальных перспектывах, якія чакаюць Беларусь і Пакістан у бліжэйшыя гады. Беларусь мае намер і ў далейшым умацоўваць і пашыраць узаемавыгаднае супрацоўніцтва з Пакістанам".

Кіраўнік ведамства адзначыў, што "Пакістан - гэта краіна, якая вядома ў свеце як калыска старажытных цывілізацый, скрыжаванне культур з унікальнымі традыцыямі". За перыяд сваёй незалежнасці Пакістан прайшоў складаны шлях станаўлення, заявіўшы аб сабе ў свеце як дзяржава, якая адбылася і актыўна развіваецца.

Віталь Воўк падкрэсліў, што Беларусь і Пакістан цесна ўзаемадзейнічаюць на міжнароднай арэне ў вырашэнні надзённых пытанняў глабальнага і рэгіянальнага парадку дня. З гэтай мэтай за апошнія два гады праведзены два раўнды палітычных кансультацый паміж міністэрствамі замежных спраў дзвюх краін. Акрамя таго, адбыліся чатыры пасяджэнні сумеснай беларуска-пакістанскай камісіі па гандлёва-эканамічным супрацоўніцтве, тры пасяджэнні сумеснай рабочай групы ў галіне сельскай гаспадаркі, пасяджэнне сумеснай рабочай групы па прамысловай кааперацыі.