Бізнес-навіны

3 кастрычніка, Мінск /Кар. БЕЛТА/. Беларусь і Кітай дамовіліся аб стварэнні сумесных прадпрыемстваў па вытворчасці адзення і феерверкаў. Такая інфармацыя размешчана на сайце Міністэрства эканомікі па выніках візіту беларускай дэлегацыі ў Кітай 24 верасня - 1 кастрычніка, паведамляе БЕЛТА.

Па выніках візіту дасягнуты дамоўленасці па прапрацоўцы паставак з Беларусі ў КНР ялавічыны, малака, лёну, стварэнні сумесных прадпрыемстваў па вытворчасці адзення, утылізацыі бытавых адходаў, вытворчасці феерверкаў, а таксама арганізацыі серыі турыстычных візітаў з правінцыі Хунань у Беларусь у наступным годзе.

Для развіцця міжрэгіянальнага гандлёва-эканамічнага супрацоўніцтва і прэзентацыі Кітайска-беларускага індустрыяльнага парка "Вялікі камень" беларуская дэлегацыя правяла два бізнес-форумы - у горадзе Нанкін правінцыі Цзянсу і горадзе Чанша правінцыі Хунань. Адбыліся афіцыйныя сустрэчы членаў дэлегацыі з губернатарамі правінцый Цзянсу і Хунань, з сакратаром Камітэта Камуністычнай партыі Кітая правінцыі Хунань, а таксама шэраг асобных сустрэч з кіраўніцтвам кітайскіх кампаній - карпарацыі SUMEC Group, холдынга Jiangsu SOHO Holding Group, карпарацыі Tuniu, Цзянсускай карпарацыі па знешнеэканамічным супрацоўніцтве, ZOOMLION, Farsoon technologies, Broad і BBG.

У час візіту падпісаны мемарандум аб далейшым умацаванні супрацоўніцтва паміж горадам Бабруйск і горадам Усі (правінцыя Цзянсу), мемарандум аб супрацоўніцтве ў сферы турызму і правядзенні кансультацый паміж Магілёўскім аблвыканкамам і правінцыяй Хунань, пратакол аб намерах аб устанаўленні пабрацімскіх адносін паміж Бабруйскам і горадам Хэн'ян правінцыі Хунань.