Бізнес-навіны
Беларусь і Германія актывізуюць навукова-тэхнічнае супрацоўніцтва
26 лістапада, Мінск /Юлія Огнева - БЕЛТА/. Беларусь і Германія актывізуюць двухбаковае навукова-тэхнічнае супрацоўніцтва ў галіне інфармацыйна-камунікацыйных тэхналогій, біятэхналогій, новых матэрыялаў і энергетыкі. Аб гэтым дамовіліся старшыня Дзяржаўнага камітэта па навуцы і тэхналогіях Беларусі Аляксандр Шумілін і пасол ФРГ у Беларусі Петэр Дэтмар, паведамілі БЕЛТА ў прэс-службе ДКНТ.
Бакі выказалі зацікаўленасць у развіцці двухбаковых кантактаў, накіраваных не толькі на даследчую работу, але і на практычны вынік - стварэнне інавацыйных і высокатэхналагічных праектаў. "Акрамя навуковага супрацоўніцтва нас цікавіць вопыт Германіі па камерцыялізацыі навукова-тэхнічных распрацовак і развіцця інавацыйнага прадпрымальніцтва, у тым ліку маладзёжнага", - падкрэсліў Аляксандр Шумілін.
У сваю чаргу Петэр Дэтмар паведаміў, што беларуска-германскае навукова-тэхнічнае і інавацыйнае супрацоўніцтва не рэалізавана ў поўнай ступені і бакі маюць шмат агульных падыходаў для яго паглыблення, у тым ліку ў энергетычнай сферы.
У прэс-службе ДКНТ адзначылі, што Германія з'яўляецца вядучым партнёрам Беларусі ў сферы міжнароднага навукова-тэхнічнага супрацоўніцтва. Нарматыўна-прававую базу супрацоўніцтва складаюць Дагавор аб развіцці шырокамаштабнага супрацоўніцтва ў сферах эканомікі, прамысловасці, навукі і тэхнікі, падпісаны ў 1993 годзе, а таксама шэраг дакументаў, падпісаных на яго аснове. Асноўнымі напрамкамі супрацоўніцтва з'яўляюцца медыцына, біятэхналогіі, энергетыка, штучны інтэлект, лазерныя тэхналогіі, оптыка.
версія для друку
зрабіць стартавай
дабавіць у выбранае