Бізнес-навіны

Башкортастан зацікаўлены ў больш глыбокай эканамічнай інтэграцыі з Беларуссю

13 снежня, Мінск /Кар. БЕЛТА/. Башкортастан зацікаўлены ў больш глыбокай эканамічнай інтэграцыі з Беларуссю, паведаміў кіраўнік Рэспублікі Башкортастан Радзій Хабіраў 12 снежня ў эфіры тэлеканала "Беларусь 1", паведамляе БЕЛТА.

Гаворачы аб выніках візіту бізнес-місіі ў Беларусь, Радзій Хабіраў адзначыў, што быў падпісаны шэраг пагадненняў. "Мы былі, у прыватнасці, на вашым вельмі вядомым прадпрыемстве "АМКАДОР", якое вырабляе камунальную, дарожна-будаўнічую, тэхніку для лясной гаспадаркі. Фарміруючы бюджэт на наступны год, мы ўжо заклалі даволі вялікія сумы для куплі камунальнай, тэхнікі для дарожнага будаўніцтва. Мы будзем з "АМКАДОРам" працаваць", - сказаў кіраўнік рэспублікі.

Ён заўважыў, што тэхніку трэба і абслугоўваць. "Гэта сэрвісныя цэнтры. Патрэбны капітальны рамонт і г.д., - сказаў Радзій Хабіраў. - Таму я прапанаваў больш глыбокую інтэграцыю нашых прадпрыемстваў. Тым больш што ўзаемная воля, узаемная выгада і жаданне ёсць. Самае галоўнае, што ў нас вельмі вялікі вопыт такіх адносін", - дадаў ён.

У Башкортастане цяпер востра маюць патрэбу ў гусенічных трактарах. "Нам цяпер патрэбны гусенічныя трактары. З прадстаўнікамі шэрага прадпрыемстваў мы перагаварылі ўжо аб тым, што пачнём паціху работу па арганізацыі зборкі гусенічных трактароў", - сказаў Радзій Хабіраў.

Сярод іншых перспектыўных напрамкаў супрацоўніцтва ў сферы глыбокай перапрацоўкі збожжа. "Былі вельмі цікавыя кантакты, паколькі мы прывезлі сваіх калег, якія курыруюць сельскую гаспадарку, з Акадэміяй навук Беларусі. Дасягненні ў галіне сельскай гаспадаркі, навуковыя прапановы нас таксама цікавяць. Мы выйшлі з прапановай да Прэзідэнта, прэм'ер-міністра аб тым, што шукаем партнёраў па глыбокай перапрацоўцы збожжа, гэта амбіцыйны праект", - адзначыў кіраўнік Башкортастана.

Акрамя таго, гэта рэспубліка зацікаўлена ў сумеснай зборачнай вытворчасці пасажырскай тэхнікі. "У гэтым годзе заключылі афсетнае пагадненне на пастаўку тралейбусаў для Уфы. Паглядзелі электробусы - цікавы праект. Нашы калегі паглядзелі вашы трамваі", - сказаў Радзій Хабіраў, дадаўшы, што "ўсё трэба разглядаць у кантэксце зборачнай вытворчасці, таму што тады зарабляе і беларускі, і наш бок".

Паводле слоў кіраўніка Башкортастана, эканоміка Беларусі актыўна развіваецца нават у такіх складаных умовах. Адносна двухбаковага супрацоўніцтва, ён падкрэсліў: ёсць усе перадумовы для значнага павелічэння тавараабароту. "Ён і цяпер вельмі нядрэнны - амаль $300 млн, і гэта нягледзячы на тое, у якой складанай сітуацыі вы знаходзіцеся, якую нагрузку, палітычны націск на эканоміку даводзіцца вытрымліваць. Тым не менш наша агульнае жаданне - гэта, вядома, павелічэнне тавараабароту. Для гэтага ёсць усе магчымасці, а галоўнае - воля і ўмелая арганізацыя работы", - сказаў ён.

Радзій Хабіраў дадаў, што пасля сустрэчы з Прэзідэнтам Беларусі Аляксандрам Лукашэнкам адбылася вялікая нарада з галіновымі міністрамі на чале з прэм'ер-міністрам, на якой адпрацавалі магчымае ўзаемадзеянне па кожным з напрамкаў: сельская гаспадарка, машынабудаванне, станкабудаванне, будаўніцтва. "Мы склалі пратакол, па якім будзем у далейшым рухацца", - адзначыў ён.

версія для друку

зрабіць стартавай

дабавіць у выбранае