Бізнес-навіны

Авіябудаванне і прамкааперацыя. Галоўчанка аб перспектывах супрацоўніцтва з Ульянаўскай вобласцю

6 кастрычніка, Мінск /Кар. БЕЛТА/. Прэм'ер-міністр Беларусі Раман Галоўчанка назваў перспектыўныя напрамкі супрацоўніцтва на сустрэчы з губернатарам Ульянаўскай вобласці Расіі Аляксеем Рускіх, перадае карэспандэнт БЕЛТА.

Прэм'ер-міністр расказаў аб напрамках супрацоўніцтва Беларусі і Ульянаўскай вобласці. Першае - гэта авіябудаванне.

"Сёння гэты напрамак атрымаў адпаведнае развіццё. Намі на федэральным узроўні падпісана праграма развіцця авіябудавання, якая вызначае практычныя напрамкі супрацоўніцтва. Упэўнены, што рэалізацыя праграмы будзе садзейнічаць вырашэнню задач, якія сёння стаяць перад авіябудаўнікамі і авіявытворцамі", - сказаў Раман Галоўчанка.

Паводле яго слоў, прадаўжаецца кааперацыйнае супрацоўніцтва паміж вытворцамі аўтамабільнай тэхнікі. Гэта ў першую чаргу УАЗ, Ульянаўскі Маторны завод.

"Мы нарошчваем пастаўкі беларускіх аўтакампанентаў на канвееры гэтых прадпрыемстваў. Вядзецца мэтанакіраваная работа па асваенні новых вузлоў, агрэгатаў і камплектуючых вырабаў. Мы маем вельмі добрую дынаміку росту паставак. Сёння нашым прадпрыемствам трэба глядзець глыбей у будучыню. Закладваць ужо цяпер адпаведныя рашэнні па распрацоўцы і вытворчасці вузлоў і кампанентаў для будучых мадэлей, якія будуць сыходзіць з канвеераў", - падкрэсліў ён.

Кіраўнік беларускага ўрада адзначыў поспехі, дасягнутыя ў пытаннях вытворчасці імпартазамяшчальнай тэхнікі.

"Ёсць пэўнае станоўчае рашэнне ў частцы вытворчасці паўпрычэпаў на шасі МАЗ для Ульянаўскай вобласці. Цяпер выраблены ўзоры, яны праходзяць сертыфікацыю. Плануем выйсці на пастаўку каля 100 адзінак", - паведаміў прэм'ер-міністр.

Акрамя таго, ён спыніўся на тэмах, па якіх трэба будзе наладзіць больш цеснае супрацоўніцтва. У першую чаргу размова ідзе пра будаўніцтва.

"Пакуль адсутнічаюць значныя праекты, якія маглі быць рэалізаваны з удзелам беларускіх будаўнічых арганізацый. Таксама яшчэ не раскрыта тэма паставак ліфтавага абсталявання", - дадаў Раман Галоўчанка.

Акрамя гэтага, маецца вялікі патэнцыял развіцця ўзаемадзеяння ў сельскай гаспадарцы.

"Я называю гэтыя напрамкі на аснове ў першую чаргу таго станоўчага вопыту, які мы маем у супрацоўніцтве з іншымі рэгіёнамі Расійскай Федэрацыі", - канстатаваў прэм'ер-міністр.

версія для друку

зрабіць стартавай

дабавіць у выбранае