Бізнес-навіны

Аўтакампаненты, лякарствы, турызм. Па якіх напрамках Беларусь і Мардовія будуць развіваць супрацоўніцтва

18 кастрычніка, Мінск /Кар. БЕЛТА/. У якіх напрамках Беларусь і Мардовія будуць развіваць супрацоўніцтва, расказаў кіраўнік Рэспублікі Мардовія Арцём Здуноў перад пасяджэннем рабочай групы па супрацоўніцтве Беларусі і гэтага рэгіёна РФ, перадае карэспандэнт БЕЛТА.

"Наша задача, каб беларускі бок нарасціў аб'ём продажаў, павялічыўшы пры гэтым сэрвіс і гарантыю якасці. Для гэтага можна лакалізаваць частку вытворчасці ў Мардовіі. У нас ёсць прадпрыемства "МардоўАўтаМаш", дзе на базе шасі МАЗ мы маглі б вырабляць тэхніку, якая патрэбна нам і нашым суседзям - Ніжняму Ноўгараду, Разані, Ульянаўску і Пензе. Мы таксама зацікаўлены ў супрацоўніцтве з МТЗ. Абмяркоўваем канкрэтныя праекты, прычым не толькі на ўзроўні дырэктараў, але таксама галоўных канструктараў і інжынераў", - заявіў Арцём Здуноў.

Паводле яго слоў, за апошнія два гады ў Мардовію прыязджала шмат спецыялістаў і дырэктараў з Беларусі. Многія з іх былі ў Саранску і азнаёміліся з прадпрыемствамі горада. А цяпер дэлегацыя Мардовіі прыбыла ў Беларусь і таксама знаёміцца з работай прамысловага сектара.

Ён адзначыў, што абмяркоўвалася супрацоўніцтва па будаўнічых матэрыялах, аўтакампанентах і іншых напрамках.

"Сур'езна гаварылі пра вытворчасць лякарстваў з плазмы крыві і прымяненне RDF-паліва. Сумесных праектаў шмат, а наш рабочы графік яшчэ не закончаны", - падкрэсліў Арцём Здуноў.

Таксама ён падзяліўся планамі па адкрыцці прамога авіярэйса паміж Беларуссю і Мардовіяй.

"Трэба вазіць у Беларусь групы моладзі з нашага рэгіёна і паказваць ім мясціны баявой славы. Таксама было б нядрэнна наведаць і беларускім хлопцам і дзяўчатам славутасці Мардовіі. Мы вельмі патрыятычна настроены: займаемся стварэннем ваенна-патрыятычных лагераў, развіваем кадэцкі рух і маглі б абмяняцца вопытам у гэтым напрамку. У цэлым, названы рэйс будзе добрым турыстычным маршрутам", - лічыць кіраўнік Рэспублікі Мардовія.

Акрамя таго, ён звярнуў увагу на важнасць падтрымання культурнага абмену і ўзаемных візітаў. "Будзем чакаць у сябе дэлегацыю ад Беларусі, запрашаем на нашы творчыя фестывалі", - рэзюмаваў Арцём Здуноў.

версія для друку

зрабіць стартавай

дабавіць у выбранае