Бізнес-навіны

Аршанскі завод "Чырвоны барацьбіт" асвойвае новыя рынкі ў Еўропе

Фота з архiва

6 ліпеня, Віцебск /Андрэй Шчарбіцкі - БЕЛТА/. Аршанскі станкабудаўнічы завод "Чырвоны барацьбіт" у бягучым годзе пачаў асвойваць новыя рынкі для сваёй прадукцыі ў Еўропе, паведамілі карэспандэнту БЕЛТА на прадпрыемстве.

Нягледзячы на пандэмію, завод працуе з прыбыткам. "Пастаянна праводзім работу па дыверсіфікацыі экспарту і пошуку новых рынкаў збыту ў краінах Еўрасаюза і Сярэдняга Усходу. У бягучым годзе, акрамя традыцыйных рынкаў Беларусі, Расіі і Казахстана, прадукцыя завода адгружалася ў Германію, Літву, Украіну, Чэхію, Нарвегію, Турцыю, Італію і Польшчу", - адзначылі на заводзе.

У 2019 годзе завод вырабіў 340 станкоў. У студзені - маі 2020 года - 180 адзінак, або 141,7 працэнта да аналагічнага перыяду мінулага года. Рост экспарту ў далёкае замежжа за пяць месяцаў гэтага года склаў 145 працэнтаў. Удзельная вага паставак за мяжу складае 50-80 працэнтаў аб'ёму вытворчасці.

У бягучым годзе прадпрыемства да свайго 120-годдзя плануе вырабіць доследны ўзор інавацыйнага ўніверсальнага круглашліфывальнага станка з ЛПК асабліва высокай дакладнасці. Распрацоўку вядуць сумесна з НАН Беларусі. Чакаецца, што абсталяванне дасць магчымасць выйсці на новы ўзровень у стварэнні прэцызійных станкоў асабліва высокай дакладнасці, аналагаў якім няма ў краінах ЕАЭС.

Станказавод "Чырвоны барацьбіт" заснаваны ў 1900 годзе. Ён адзін з лідараў сярод станкабудаўнічых прадпрыемстваў па вытворчасці металаапрацоўчага абсталявання ў краіне. Завод выпускае практычна ўсю лінейку шліфавальных станкоў. Сёння на "Чырвоным барацьбіце" працуюць больш як 500 чалавек. Прадукцыя завода пастаўляецца ў 115 краін.

версія для друку

зрабіць стартавай

дабавіць у выбранае