Бізнес-навіны

Арганізацыі Кіраўніцтва справамі Прэзідэнта ў 2023 годзе нарасцілі экспарт турыстычных паслуг на 35 працэнтаў

Фота з архiва

22 лютага, Мінск /Кар. БЕЛТА/. Арганізацыі Кіраўніцтва справамі Прэзідэнта ў 2023 годзе нарасцілі экспарт турыстычных паслуг на 35 працэнтаў, паведамілі карэспандэнту БЕЛТА ў прэс-службе Кіраўніцтва справамі па выніках пасяджэння калегіі ведамства.

"Актыўна развіваецца турыстычная дзейнасць. У 2023 годзе ў прыродаахоўных і лесагаспадарчых установах Кіраўніцтва справамі Прэзідэнта аб'ём турыстычных паслуг вырас амаль на трэць. Экспарт турыстычных паслуг вырас на 35 працэнтаў. Турыстычныя аб'екты наведалі больш за 866 тыс. чалавек, у тым ліку 82 тыс. замежных турыстаў (141,6 працэнта да 2022 года)", - расказалі ў прэс-службе.

З улікам устойліва ўзрастаючага попыту на наведванне нацыянальных паркаў Кіраўніцтва справамі Прэзідэнта актыўна займаецца развіццём іх турыстычнай інфраструктуры. Вялікі праект па мадэрнізацыі аб'ектаў цяпер рэалізуецца ў Белавежскай пушчы, у тым ліку ідзе пашырэнне аб'ектаў харчавання і пражывання турыстаў. Плануецца рэканструкцыя і будаўніцтва спальных карпусоў на базах адпачынку ў нацпарку "Браслаўскія азёры". Да 100-годдзя Бярэзінскага біясфернага запаведніка (2025 год) запланавана шмат мерапрыемстваў па будаўніцтве і мадэрнізацыі турыстычных аб'ектаў, у тым ліку па напрамку экалагічнай асветы. Вёска Домжарыцы, у якой размешчана адміністрацыя запаведніка, уключана ў рэспубліканскі праект "Вёска будучыні".

Умовы для развіцця турыстычнай дзейнасці ствараюцца і ў санаторыях, якія знаходзяцца ў веданні Кіраўніцтва справамі Прэзідэнта. Напрыклад, на возеры Нарач санаторыі "Прыазёрны" і "Сосны" добраўпарадкавалі новыя пляжна-паркавыя зоны. Гэтымі месцамі адпачынку на беразе возера могуць скарыстацца ўсе адпачывальнікі, не толькі наведвальнікі санаторыяў. Новая прыбярэжна-паркавая зона з дзіцячымі пляцоўкамі, дарожкамі, адкрытым басейнам з падагрэвам, вадзянымі пушкамі, гідрамасажам, сістэмай атракцыёнаў і месцам адпачынку круглагадовага выкарыстання адкрыта на беразе Мінскага мора санаторыем "Юнацтва".

У 2023 годзе санаторыі Кіраўніцтва справамі Прэзідэнта наведалі 107 тыс. адпачывальнікаў (тэмп росту да 2022 года - 102,6 працэнта), з іх 62 працэнты - замежныя грамадзяне. Вырасла значна колькасць гасцей і ў гасцініц Кіраўніцтва справамі. У 2023 годзе ў іх былі размешчаны 137 тыс. чалавек (тэмп росту да 2022 года - 142,9 працэнта), з іх 84,4 працэнта - замежныя грамадзяне. Цяпер гасцініцы таксама прадаўжаюць мадэрнізацыю з мэтай павышэння камфорту і якасці паслуг і іх пашырэння.

Аб'ём вытворчасці па аб'яднанні "Белмастацпромыслы", што ўваходзіць у сістэму Кіраўніцтва справамі, па выніках 2023 года вырас прыкладна на трэць, у тым ліку вырабаў народных мастацкіх рамёстваў выраблена ў паўтара раза больш. У мэтах мадэрнізацыі вытворчасці і паляпшэння ўмоў працы работнікаў на фабрыцы "Слуцкія паясы" (Слуцк) вядзецца будаўніцтва новага адміністрацыйна-вытворчага корпуса. У ААТ "Белмастацкераміка" (Радашковічы) мадэрнізуецца тэхналагічнае абсталяванне, якое дасць магчымасць істотна павысіць якасць вырабляемай прадукцыі і пашырыць яе асартымент. Дзякуючы прымаемым мерам і рабоце прадпрыемстваў аб'яднання "Белмастацпромыслы" захавана больш за 10 відаў старадаўніх народных рамёстваў, у тым ліку ткацтва і вышыванне, ганчарная справа, разьба па дрэве, салома- і лозапляценне, размалёўка па шкле, дрэве і тканіне. У арганізацыях аб'яднання працуюць больш за 1100 чалавек, з іх каля 230 з'яўляюццая майстрамі народных мастацкіх промыслаў.

"Сярод прыярытэтных задач на 2024 год для арганізацый Кіраўніцтва справамі Прэзідэнта - прадоўжыць тэхнічнае перааснашчэнне і мадэрнізацыю дзеючых вытворчасцей, а таксама стварэнне новых. У мэтах далейшага лічбавага развіцця арганізацый у бягучым годзе запланаваны да рэалізацыі праекты па распрацоўцы і ўкараненні аўтаматызаваных інфармацыйных сістэм у сферы турыстычнай і санаторна-курортнай дзейнасці, а таксама ў галіне будаўніцтва, праектавання, жыллёва-камунальнай гаспадаркі, аховы здароўя і гандлю", - рэзюмавалі ў прэс-службе.

версія для друку

зрабіць стартавай

дабавіць у выбранае